یو این ایس
سرینگر// ہماچل پردیش پولیس نے بِلاسپور ضلع میں کشمیری شال فروش پر ہونے والے سنگین حملے کے سلسلے میں ایف آئی آر درج کی ہے۔واقعہ گھمارون پولیس اسٹیشن میں درج کیا گیا، جس میں بھارتیہ نیایا سنہتا (بی این ایس) کی دفعات 126(2)، 115(2) اور 324(4) شامل ہیں۔ پولیس ٹیمیں ملزمان کی شناخت اور گرفتاری کے لیے مہم چلا رہی ہیں اور چھاپے جاری ہیں۔ حکام نے بتایا کہ معاملہ زیرِ تحقیقات ہے۔یہ واقعہ ہماچل پردیش میں کشمیری شال فروشوں کے خلاف بڑھتے ہوئے خدشات کے درمیان سامنے آیا، جہاں مبینہ طور پر تاجروں کو روک کر، سوالات کیے گئے اور بار بار دستاویزات کی جانچ پڑتال کی گئی، باوجود اس کے کہ ان کے پاس درست شناختی کاغذات اور پولیس کی تصدیق موجود تھی۔ بعض معاملات میں تاجروں سے کاروبار روکنے اور واپس جانے کا کہا گیا، جس سے خوف اور دھمکی کا ماحول پیدا ہوا۔جموں کشمیرسٹوڈنٹس ایسو سی ایشن نے اپوزیشن لیڈر راہول گاندھی اور ہماچل پردیش کے وزیر اعلیٰ کے دفتر کا شکریہ ادا کیا کہ انہوں نے فوری طور پر اس معاملے پر توجہ دی۔ چیف منسٹر کے میڈیا ایڈوائزر نریش چوہان نے یقین دہانی کرائی ہے کہ سولن اور کنگڑا اضلاع سے موصول ہونے والے مشابہہ واقعات میں بھی ایف آئی آر درج کی جائیں گی اور کوئی ملزم نہ بخشا جائے گا۔انہوں نے کہا اپوزیشن لیڈر کے دفتر نے واضح کیا کہ کشمیری تاجروں کے خلاف کسی بھی قسم کی ہراسانی، دھمکی یا تشدد کسی صورت برداشت نہیں کیا جائے گا۔
