عظمیٰ نیوز سروس
سرینگر// وزیر اعلیٰ عمر عبداللہ نے جمعہ کو بی جے پی پر ریاستی حیثیت کے معاملے پر “بلیک میل کی سیاست” پر عمل پیرا ہونے کا الزام لگایا اور کہا کہ کابینہ کی توسیع میں تاخیر کا تعلق مرکز کے زیر انتظام علاقے کی حیثیت سے ہے نہ کہ حکمران نیشنل کانفرنس کے اندر کسی خوف کی وجہ سے۔ قائد حزب اختلاف کے ریمارکس کا جواب دیتے ہوئے، عبداللہ نے کہا کہ “نیشنل کانفرنس میں کوئی ایکناتھ شنڈے نہیں ہیں” اور زور دے کر کہا کہ پارٹی کے تمام قانون ساز متحد ہیں۔عبداللہ نے نامہ نگاروں کو بتایا، یہ ظاہر ہے کہ ایل او پی جموں و کشمیر کے وزیر کی کرسی پر بیٹھنے کے لیے بے چین ہے۔
حد بندی کے بارے میں جاری بحث کا حوالہ دیتے ہوئے، وزیر اعلیٰ نے الزام لگایا کہ جموں و کشمیر میں یہ مشق “صرف بی جے پی اور اس کے دوستوں کو فائدہ پہنچانے کے لیے” کی گئی تھی۔انہوں نے کہا”ہمیں ان کی حد بندی کا سامنا کرنا پڑا اور ہم حد بندی کے بارے میں جانتے ہیں،یہ صرف بی جے پی اور بی جے پی کے دوستوں کو فائدہ پہنچانے کے لیے کیا گیا تھا” ۔عبداللہ نے کہا کہ کابینہ کی توسیع سیاسی عدم استحکام کی وجہ سے نہیں بلکہ جموں و کشمیر کو ریاست کا درجہ دوبارہ حاصل کرنے کی وجہ سے رکی ہے۔انہوں نے کہا کہ کابینہ کی توسیع اس لیے رک گئی ہے کہ ہمیں ریاست کا درجہ نہیں دیا گیا، خوف کی وجہ سے کابینہ کی توسیع نہیں رکی۔وزیر اعلیٰ نے مزید الزام لگایا کہ بی جے پی جموں و کشمیر میں منتخب حکومت کے کام میں رکاوٹ ڈالنے کی کوشش کر رہی ہے۔انہوں نے کہا کہ ایل او پی اپنے بیانات سے ثابت کرتے ہیں کہ جب تک بی جے پی کو یہاں حکومت نہیں ملتی، وہ ہمیں ٹھیک سے کام نہیں کرنے دیں گے اور وہ جموں و کشمیر کو ریاست نہیں بنائیں گے۔انہوں نے الزام لگایا کہ جموں و کشمیر کے لوگوں کو “ریاست کے نام پر دھمکیاں” دی جا رہی ہیں اور کہا کہ جنہوں نے گزشتہ انتخابات میں بی جے پی کو ووٹ دیا تھا انہیں یاد رکھنا چاہئے کہ پارٹی “بلیک میل سیاست” میں ملوث ہے۔عبداللہ نے حکومت سازی کے حوالے سے سپریم کورٹ کے مشاہدات اور ماضی کی نظیروں کا بھی حوالہ دیا اور کہا کہ واحد سب سے بڑی پارٹی کو حکومت بنانے کے لیے مدعو کیا جانا چاہیے اور اسے ایوان کے فلور پر اپنی اکثریت ثابت کرنے کا موقع دیا جانا چاہیے۔دیگر ریاستوں میں سیاسی پیش رفت کا حوالہ دیتے ہوئے عمر نے کہا، “ایکناتھ شنڈے اس لیے چلے گئے کیونکہ بی جے پی نے اس کی مدد کی تھی۔”
