بڈھال میں پراسرار مرض کے مزید تین کیسز رپورٹ، مریض ہسپتال منتقل

راجوری// راجوری ضلع کے بڈھال علاقے میں ‘پراسرار بیماری’ کے مزید تین کیسز سامنے آئے ہیں، جنہیں بہتر طبی امداد کے لیے منتقل کیا جا رہا ہے۔
ایک عہدیدار نے بتایا کہ منگل کے روز 25 سالہ نوجوان اعجاز احمد میں پراسرار بیماری کی علامات ظاہر ہوئیں، جسے پہلے جی ایم سی جموں لے جایا گیا اور بعد میں پی جی آئی چندی گڑھ منتقل کیا گیا۔
انہوں نے مزید بتایا کہ بدھ کے روز اسی بیماری کے مزید دو کیسز رپورٹ ہوئے ہیں، جنہیں بھی اعلیٰ طبی امداد کے لیے منتقل کیا جا رہا ہے۔
دریں اثنا، صوبائی کمشنر جموں رمیش کمار نے کوٹرنکہ علاقے کا دورہ کیا تاکہ صورتحال کی نگرانی اور بہتر انتظامات کو یقینی بنایا جا سکے۔
واضح رہے کہ پچھلے 50 دنوں میں علاقے میں 17 افراد کی جانیں جا چکی ہیں، تاہم حکومت ابھی تک ان اموات کی وجوہات معلوم نہیں کر سکی ہے۔
تحقیقات مختلف سطحوں پر جاری ہیں تاکہ ان اموات کی وجوہات معلوم کی جا سکیں۔ حکومت نے دعویٰ کیا ہے کہ علاقے میں کسی وائرس یا انفیکشن کا کوئی خطرہ نہیں، لیکن بدھال علاقے کو کنٹینمنٹ زون قرار دے دیا گیا ہے۔ متاثرہ خاندانوں کے گھروں کو سیل کر دیا گیا ہے اور ان کے قریبی رابطوں کو جی ایم سی راجوری منتقل کیا گیا ہے۔
مزید، متاثرہ گاؤں میں ٹیمیں تعینات کر دی گئی ہیں تاکہ صورتحال کا باریک بینی سے جائزہ لیا جا سکے۔