کانگریس کے دور میں دہشت گردوں کا احترام کیا جاتا تھا: انوراگ ٹھاکر

عظمیٰ ویب ڈیسک
چندی گڑھ/بھارتیہ جنتا پارٹی (بی جے پی) کے سینئر لیڈر اور ایم پی انوراگ ٹھاکر نے منگل کو الزام لگایا کہ کانگریس کے دور حکومت میں دہشت گردوں کا احترام کیا جاتا تھا۔ ٹھاکر نریندر مودی حکومت کے 11 سال مکمل ہونے پر بی جے پی کے دفتر میں ایک پریس کانفرنس سے خطاب کر رہے تھے۔ انہوں نے کہا کہ ہندستانی فوج نے آپریشن سندورکے تحت پاکستانی سرزمین پر دہشت گردوں کے 9 کیمپوں اور 11 ایئربیس کو تباہ کرکے دنیا کو ہندستان کی طاقت کا ڈنکا بجایا اور دنیا کو ہندستان کی طاقت سے آگاہ کر دیا ہے۔
اس کے برعکس کانگریس کے دور میں دہشت گردوں کی عزت کی جاتی تھی۔ہماچل پردیش کی ہمیر پور سیٹ سے ایم پی مسٹر ٹھاکر نے مودی حکومت کی اسکیموں اور کامیابیوں کو گناتے ہوئے کہا کہ کانگریس کے دور حکومت میں اندرا گاندھی سے لے کر منموہن سنگھ تک صرف غریبی ہٹاؤ کا نعرہ دیا جاتاتھا لیکن اب اعداد و شمار بتاتے ہیں کہ حقیقت میں 25 کروڑ سے زیادہ لوگ خط افلاس سے باہر نکل آئے ہیں۔سابق مرکزی وزیر نے دعویٰ کیا کہ وزیر اعظم کی انتیودیا پالیسی کو ترجیح دیتے ہوئے حکومت نے اس بات کو یقینی بنایا ہے کہ ترقی کے فوائد آخری فرد تک پہنچیں۔