راجوری: آپریشن ‘‘شیروالی‘‘35ویں روز میں داخل، سرچ آپریشن جاری

عظمیٰ ویب ڈیسک
راجوری/جموں و کشمیر کے ضلع راجوری کے گمبھیر مغلاں سیکٹر کے جنگلات میں جاری آپریشن ’’شیروالی‘‘آج 35ویں روز میں داخل ہوگیا ہے۔ جموں و کشمیر پولیس اور دیگر سیکورٹی ایجنسیاں مشترکہ طور پر علاقے میں بڑے پیمانے پر تلاشی اور نگرانی کی کارروائیاں جاری رکھے ہوئے ہیں۔
سرکاری ذرائع کے مطابق، آپریشن کے دوران سیکورٹی فورسز نے پورے علاقے میں سخت چوکس رہتے ہوئے سرچ اور سرویلنس کو مزید تیز کر دیا ہے۔ تمام متعلقہ ایجنسیاں باہمی تال میل کے ساتھ کارروائی انجام دے رہی ہیں تاکہ آپریشن کے تمام مقاصد کامیابی کے ساتھ حاصل کیے جا سکیں۔
واضح رہے کہ آپریشن ’شیروالی‘مئی کے آخری ہفتے میں شروع کیا گیا تھا۔ یہ ایک وسیع پیمانے پر انسدادِ ملی ٹینسی آپریشن ہے، جس کا مقصد گمبھیر مغلاں کے گھنے جنگلات اور دشوار گزار پہاڑی علاقوں میں موجود مبینہ مسلح دراندازوں کا سراغ لگا کر انہیں بے اثر بنانا ہے۔
حکام کا کہنا ہے کہ علاقے میں سرچ آپریشن بدستور جاری ہے اور سیکورٹی فورسز مسلسل نگرانی کے ذریعے علاقے پر اپنی گرفت مضبوط بنائے ہوئے ہیں۔ کسی بھی ناخوشگوار واقعے سے نمٹنے کے لیے اضافی سیکورٹی انتظامات بھی کیے گئے ہیں۔انہوں نے مزید کہا کہ آپریشن اس وقت تک جاری رہے گا جب تک پورے علاقے کی مکمل تلاشی اور کلیئرنس مکمل نہیں ہو جاتی اور تمام مقررہ اہداف حاصل نہیں کر لیے جاتے۔