او بی سی کی ریزرویشن میں اضافہ بی جے پی نے نہیں بلکہ کمیشن نے کیا: اشوک کول

سرینگر// بی جے پی کے جنرل سکریٹری (آرگنائزیشنز) اشوک کول کا کہنا ہے کہ او بی سی کی ریزرویشن میں اضافہ بی جے پی نے نہیں بلکہ کمیشن نے کیا ہے۔
انہوں نے کہا کہ او بی سی کے جو ریزویشن کا شیڈول باقی ملک میں ہے وہی جموں وکشمیر میں بھی ہے۔
موصوف جنرل سکریٹری نے ان باتوں کا اظہار جمعرات کو یہاں ایک تقریب کے حاشیئے پر نامہ نگاروں کے ساتھ بات کرنے کے دوران کیا۔
انہوں نے کہا: ‘او بی سی جس کو پہلے او ایس سی کہتے تھے کو پہلے 2 فیصد ریزرویشن تھی پھر بی جے پی نے اس کو بڑھا کر 4 فیصدی کر دیا اور اس کے بعد کمیشں نے اس کو مزید اضافہ کرکے 8 فیصد کر دیا گیا ہے۔
انہوں نے کہا کہ یہ اضافہ بی جے پی نے نہیں بلکہ کمیشن نے کیا ہے’۔
ان کا کہنا تھا کہ او بی سی کی ریزرویشن میں جو شیڈول پورے ملک میں ہے وہی جموں وکشمیر میں بھی ہے۔
انہوں نے کہا کہ اگر اس میں کوئی نا انصافی ہے تو وزیر اعلیٰ عمر عبداللہ نے اس کے لئے ایک سب کمیٹی بنائی ہے جو اس کو دیکھے گی۔
مسٹر کول نے کہا کہ بی جے پی 26 نومبر سے 26 جنوری تک دو ماہ کے دوران آئین کے احترام میں تقاریب کا اہتمام کر رہی ہے۔
انہوں نے کہا کہ ان تقاریب میں یہ بتایا جا رہا ہے کہ آئین کو کس طرح آگے بڑھایا جا سکتا ہے۔
ان کا کہنا تھا کہ ہمارا آئین دنیا کا سب سے بڑا اور مکمل آئین ہے جس میں تمام ذاتوں کے حقوق کا احترام کیا گیا۔
جنرل سکریٹری نے کہا کہ جموں وکشمیر میں 50 ہزار کروڑ روپیوں کے انفراسٹرکچر پروجیکٹ بن رہے ہیں۔
انہوں نے کہا کہ کشمیر اور جموں میں رنگ روڈ بن رہے ہیں، ایکسپریس ویز بن رہے ہیِ ریلوے یہاں آر ہے ہیں۔
ان کا کہنا تھا کہ انفراسٹرکچر میں اس سے زیادہ نہیں کیا جا سکتا ہے۔