این ڈی اے حکومت جموں و کشمیر میں ملی ٹینسی پر قابو پانے میں کامیاب ہوئی:امت شاہ

حیدرآباد//مرکزی وزیر داخلہ امت شاہ نے ہفتہ کو کہاکہ آٹھ سال کے بعد، بھاجپا کی زیرِ قیادت مرکزی حکومت جموں و کشمیر میں دہشت گردی کے واقعات، شمال مشرق میں شورش اور بائیں بازو کی انتہا پسندی پر قابو پانے میں کافی حد تک کامیاب رہی ہے ۔
سردار ولبھ بھائی پٹیل نیشنل پولیس اکیڈمی (ایس وی پی این پی اے) میں انڈین پولیس سروس (آئی پی ایس) کے پروبیشنرز کے 74ویں بیچ کی پاسنگ آؤٹ پریڈ سے خطاب کرتے ہوئے شاہ نے کہا کہ بھارتی سرکاری ایجنسیوں نے پولیس کے ساتھ مل کر پورے ملک میں ایک کامیاب آپریشن کیا اور ایک ہی دن میں پاپولر فرنٹ آف انڈیا (PFI) جیسی تنظیم پر پابندی عائد کردی۔
انہوں نے کہا، “آٹھ سال کے بعد، حکومت جموں اور کشمیر میں دہشت گردی کے واقعات، شمال مشرق میں شورش اور بائیں بازو کی انتہا پسندی پر قابو پانے میں کافی حد تک کامیاب رہی ہے”۔
انہوں نے مزید کہا کہ حال ہی میں پاپولر فرنٹ آف انڈیا پر پابندی لگا کر ہم نے دنیا کے سامنے ایک کامیاب مثال پیش کی ہے۔
انہوں نے کہا،”یہ ظاہر کرتا ہے کہ جمہوریت کے تئیں ہماری وابستگی کتنی مضبوط اور طاقت ور ہو گئی ہے”۔
انہوں نے مزید کہا کہ دہشت گردی کے خلاف زیرو ٹالرنس، انسداد دہشت گردی کے قوانین کے مضبوط فریم ورک اور ایجنسیوں کی مضبوطی اور پختہ سیاسی عزم کی وجہ سے دہشت گردی سے متعلق واقعات میں کمی آئی ہے۔
امت شاہ نے کہا کہ گزشتہ سات دہائیوں کے دوران ملک نے کئی اتار چڑھاؤ دیکھے ہیں اور داخلی سلامتی میں بھی کئی مشکل وقت دیکھے ہیں۔