مغل روڈ، سونہ مرگ–کرگل روڈ اور سنتھن روڈ ہنوز بند

سرینگر// جنوبی کشمیر کے ضلع شوپیاں کو جموں صوبے کے پونچھ اور راجوری اضلاع کے ساتھ جوڑنے والے تاریخی مغل روڈ اور وادی کو لداخ یونین ٹریٹری کے ساتھ جوڑنے والے سونہ مرگ-کرگل روڈ پر جمعہ کو دوسرے روز بھی ٹریفک کی نقل وحمل بند ہے۔تاہم وادی کو ملک کے باقی حصوں کے ساتھ جوڑنے والی سرینگر–جموں قومی شاہراہ پر ٹریفک کی دوطرفہ نقل و حمل حسب معمول جاری ہے۔
جموں وکشمیر ٹریفک پولیس نے ‘ایکس’ ہینڈل پر ایک پوسٹ میں کہا کہ مغل روڈ، سونہ مرگ–کرگل روڈ اور سنتھن روڈ پر تازہ برف باری کی وجہ سے ٹریفک کی نقل و حمل بند ہے۔
انہوں نے کہا کہ روڈ ٹھیک کرنے والی ایجنسیوں کی طرف سے گرین سگنل ملنے کے بعد ہی ان پر ٹریفک کو بحال کیا جائے گا۔
بتادیں کہ تازہ برف باری کے باعث ان سڑکوں پر جمعرات کو ٹریفک کی نقل و حمل روک دی گئی تھی۔وادی کو ملک کے باقی حصوں کے ساتھ جوڑنے والی سرینگر–جموں قومی شاہراہ پر ٹریفک کی دو طرفہ آمد و رفت حسب معمول جاری ہے۔
حکام نے مسافرں سے قومی شاہراہ پر لین ڈسپلن پر عمل کرنے کی تاکید کی ہے۔انہوں نے مسافروں سے کہا ہے کہ وہ قومی شاہراہ پر دن کے دوران ہی سفر کریں اور چٹانیں کھسکنے یا مٹی کے تودے گر آنے کے خدشات کے پیش نظر رام بن اور بانہال کے درمیان غیر ضروری طور رکنے سے اجتناب کریں۔