ڈوڈہ میں رہائش پذیر غیر مقامی افراد، کرایہ داروں، گھریلو ملازمین کی تصدیق کا حکم

ڈوڈہ// ڈسٹرکٹ مجسٹریٹ ڈوڈہ نے ضلع میں رہائش پذیر غیر مقامی افراد کی شناخت اور تصدیق کرنے کا حکم دیا ہے۔
تفصیلات کے مطابق، ڈوڈہ ضلع میں امن و امان کی صورتحال کا جائزہ لینے کے لیے مجسٹریٹس اور پولیس افسران کی ایک میٹنگ منعقد ہوئی۔
ضلع مجسٹریٹ ویش پال مہاجن نے میٹنگ کے دوران افسران کو ہدایت دی کہ ضلع میں رہائش پذیر تمام کرایہ داروں، گھریلو ملازموں اور دیگر غیر مقامی لوگوں کی تفصیلات جمع کریں۔
سول اور پولیس انتظامیہ کے افسران نے ڈی ایم اور ایس ایس پی کو اپنے اپنے دائرہ اختیار میں لوگوں کی بنیادی پریشانیوں کے بارے میں تفصیلی رائے دی۔
اسی دوران ڈی ایم نے ضلع میں غیر مقامی بھکاریوں/ چندہ جمع کرنے والوں، سادھووں کے اندراج کا بھی حکم دیا۔
اجلاس کے دوران ضلع میں کئے گئے حفاظتی اقدامات پر تبادلہ خیال کیا گیا، اور ضلع کو پرامن رکھنے کے لیے ایکشن پلان بنانے کا فیصلہ کیا گیا۔
اجلاس کے دوران متعلقہ محکموں سے کہا گیا کہ انسداد تجاوزات مہم کے بعد حاصل شدہ اراضی کی دیکھ بھال کو یقینی بنائیں۔ اسی دوران زور دیا گیا کہ انسداد تجاوزات مہم کو تیز کیا جائے اور غیر قانونی کان کنی اور تعمیرات پر کڑی نظر رکھی جائے۔
ڈی ایم نے غیر قانونی سرگرمیوں میں استعمال ہونے والی گاڑیوں کو ضبط کرنے، ہسٹری شیٹرز پر نظر رکھنے اور سیکشن 144 سی آر پی سی اور حکام کی طرف سے دیگر سیکشنز کے تحت عائد پابندیوں کی خلاف ورزی کرنے والوں کے خلاف سخت کارروائی شروع کرنے کی ہدایت دی۔