وزیر اعظم نریندر مودی کی قیادت میں گزشتہ بارہ برسوں میں جموں و کشمیر کی ترقی کا منظرنامہ بدل گیا | ادھم پور سول ایئرپورٹ آئندہ چندماہ میں فعال ہو گا

وکست بھارت کا وژن گزشتہ12برسوںکی مضبوط نیوپر قائم ،نوجوان ملک کی ترقی میں فعال کردار ادا کریں:ڈاکٹر جتیندر

عظمیٰ نیوزسروس

ادھم پور//ادھم پور کا سول ایئرپورٹ آئندہ چند مہینوں میں فعال ہو جائے گا۔ ایئرپورٹ ٹرمینل کی تعمیر کے لیے تقریباً تین ہفتے قبل ٹینڈر جاری کیا گیا تھا اور ضروری کارروائی مکمل ہونے کے بعد ورک آرڈر جاری کر دیا جائے گا۔یہ بات مرکزی وزیر مملکت (آزادانہ چارج) برائے سائنس و ٹیکنالوجی، ارتھ سائنسز، پی ایم او، عملہ، عوامی شکایات، پنشن، ایٹمی توانائی اور خلائی امور، ڈاکٹر جتیندر سنگھ نے ادھم پور میں ایک عوامی پروگرام کے دوران کہی۔وزیر نے کہا کہ ایئرپورٹ کو ابتدائی طور پر اے ٹی آر طیاروں کی پروازوں کے لیے تیار کیا جا رہا ہے، جس سے علاقائی فضائی رابطے میں نمایاں بہتری آئے گی اور سیاحت، تجارت، سرمایہ کاری اور روزگار کے مواقع کو فروغ ملے گا۔ڈاکٹر جتیندر سنگھ نے مزید کہا کہ جموں و کشمیر حکومت کے ساتھ اضافی زمین کی منتقلی کے حوالے سے بات چیت جاری ہے تاکہ اس منصوبے کو مزید وسعت دے کر اسے جموں ایئرپورٹ کی طرز پر ایک بڑا اور مکمل ایئرپورٹ بنایا جا سکے۔اجتماع سے خطاب کرتے ہوئے ڈاکٹر جتیندر سنگھ نے کہا کہ وزیر اعظم نریندر مودی کی قیادت میں گزشتہ بارہ برسوں میں جموں و کشمیر کی ترقی کا منظرنامہ بدل گیا ہے اور ادھم پور اس ترقی کا ایک اہم مرکز بن کر ابھرا ہے، جہاں انفراسٹرکچر کی توسیع، بہتر رابطہ، عوامی فلاحی اقدامات اور معاشی ترقی میں اضافہ ہوا ہے۔انہوں نے کہا کہ مودی حکومت کی سب سے بڑی کامیابیوں میں پردھان منتری جن دھن یوجنا کا مؤثر نفاذ شامل ہے، جس نے ملک میں مالی شمولیت کو فروغ دیا۔ اس کے تحت کروڑوں غیر بینک شدہ افراد، خاص طور پر خواتین، دیہی آبادی اور کمزور طبقات کو بینکاری نظام سے جوڑا گیا۔انہوں نے کہا کہ ادھم پور کی ترقی ایک ترقی پذیر بھارت کی عکاسی کرتی ہے جہاں عوام کی امیدوں کو مواقع سے جوڑا گیا ہے اور حکمرانی کو نچلی سطح تک پہنچایا گیا ہے۔ڈاکٹر جتیندر سنگھ نے کہا کہ جموں و کشمیر میں انفراسٹرکچر انقلاب کی ایک نمایاں مثال چنانی-ناشری راستے پر ڈاکٹر شیاما پرساد مکھرجی ٹنل ہے، جس نے سفر کا وقت کم کیا اور ہر موسم میں رابطہ ممکن بنایا۔ انہوں نے مزید کہا کہ اب اس کے ساتھ ایک نئی ڈبل ٹیوب ٹنل کی منظوری بھی دی گئی ہے۔انہوں نے ادھم پور کے روایتی دودھ سے بننے والے پراڈکٹ “کلاڑی” کو جی آئی ٹیگ ملنے کا ذکر کرتے ہوئے کہا کہ اس سے مقامی پیداوار کو قومی اور بین الاقوامی سطح پر پہچان ملی ہے۔ڈاکٹر جتیندر سنگھ نے کہا کہ کٹھوعہ کے گھاٹی میں بائیوٹیک انڈسٹریل پارک کے قیام سے جموں و کشمیر بائیوٹیکنالوجی کے نقشے پر ابھرا ہے، جس سے روزگار اور صنعت کے نئے مواقع پیدا ہوئے ہیں۔انہوں نے کہا کہ دہلی-امرتسر-کٹرا ایکسپریس وے اور دیگر سڑک منصوبے سفر کے وقت کو کم کریں گے اور اقتصادی سرگرمیوں کو تیز کریں گے۔وزیر نے جموں و کشمیر میں وندے بھارت ٹرین سروس کے آغاز کو بھی ایک بڑی کامیابی قرار دیا، جس سے سفر تیز، محفوظ اور آرام دہ ہوا ہے۔انہوں نے کہا کہ گزشتہ دہائی میں دھار روڈ اور دیگر سڑکوں کی بہتری سے دور دراز علاقوں میں رہنے والے لوگوں کو بہتر سہولت ملی ہے۔انہوں نے منتلائی علاقے کی ترقی کا بھی ذکر کیا جہاں سیاحت اور بنیادی سہولیات کو فروغ دیا جا رہا ہے۔انہوں نے ادھم پور-سری نگر-بارہمولہ ریلوے لنک، دریائے چناب پر دنیا کے بلند ترین ریلوے پل، تعلیمی و صحت کی سہولیات میں اضافہ، لیونڈر مشن، ڈیجیٹل کنیکٹیویٹی اور مختلف فلاحی اسکیموں کا بھی ذکر کیا۔انہوں نے کہا کہ وکست بھارت2047 کا وژن گزشتہ بارہ سالوں کی مضبوط بنیاد پر قائم ہے اور نوجوانوں سے اپیل کی کہ وہ ملک کی ترقی میں فعال کردار ادا کریں۔