ایجنسیز
ڈھاکہ// بنگلہ دیش میں بھارت کے نئے ہائی کمشنر دنیش ترویدی جمعہ کے روز اپنی سفارتی ذمہ داریاں سنبھالنے کے لیے پیٹراپول- بیناپول زمینی سرحد کے راستے بنگلہ دیش پہنچ گئے۔ترویدی، جو بنگلہ دیش میں بھارت کے ایلچی کے طور پر خدمات انجام دینے والے پہلے سیاست دان ہیں، سرحدی دروازہ کھلنے کے بعد اپنا ٹرالی بیگ خود اٹھائے بنگلہ دیش میں داخل ہوتے ہوئے نظر آئے۔ ان کے ہمراہ ان کی اہلیہ مرنال ترویدی بھی موجود تھیں۔سرحد عبور کرنے کے بعد ترویدی نے مختصراً کہا، یہاں آ کر خوشی ہوئی۔بیناپول زمینی سرحد پر بنگلہ دیشی حکام اور بھارتی ہائی کمیشن کے سینئر عہدیداروں نے ان کا استقبال کیا۔سابق مرکزی وزیر اور بھارتیہ جنتا پارٹی (بی جے پی) کے رہنما دنیش ترویدی نے پرنئے کمار ورما کی جگہ لی ہے، جو انڈین فارن سروس کے 1994 بیچ کے افسر تھے۔ورما کی چار سالہ مدت گزشتہ ماہ مکمل ہوئی۔ ان کی تعیناتی کے دوران اگست 2024 میں طلبہ کی قیادت میں ہونے والی عوامی تحریک کے نتیجے میں شیخ حسینہ کی حکومت کا خاتمہ ہوا، جس کے بعد محمد یونس کی سربراہی میں قائم عبوری انتظامیہ کے دور میں بھارت اور بنگلہ دیش کے تعلقات میں سرد مہری دیکھی گئی۔رواں سال کے اوائل میں بنگلہ دیش میں انتخابات منعقد ہوئے، تاہم شیخ حسینہ کی عوامی لیگ کو انتخابات میں حصہ لینے کی اجازت نہیں دی گئی۔
