جاوید اقبال
مینڈھر// کرشنا گھاٹی سیکٹر میں لائن آف کنٹرول (ایل او سی) پر دراندازی کی ایک کوشش کو فوج نے ناکام بناتے ہوئے ایک مبینہ درانداز کو ہلاک کر دیا۔ فوجی ذرائع کے مطابق واقعہ پیر کی شام تقریباً 4 بجے پیش آیا جب مسلسل نگرانی کے دوران بھارتی حدود کے اندر تقریباً 300 میٹر فاصلے پر مشتبہ نقل و حرکت دیکھی گئی۔اطلاعات کے مطابق الرٹ فوجی اہلکاروں نے فوری ردِعمل ظاہر کرتے ہوئے مشتبہ افراد کو روکنے کے لیے کارروائی شروع کی، جس کے نتیجے میں دراندازی کی کوشش ناکام بنا دی گئی۔ کارروائی کے دوران ایک درانداز مارا گیا جبکہ دیگر ممکنہ ساتھیوں کی تلاش کے لیے وسیع پیمانے پر سرچ آپریشن جاری رکھا گیا ہے۔فوجی حکام کا کہنا ہے کہ لائن آف کنٹرول پر کسی بھی قسم کی خلاف ورزی کو روکنے کے لیے سیکٹر میں نگرانی مزید سخت کر دی گئی ہے اور پورے علاقے میں ہائی آپریشنل الرٹ برقرار ہے۔ سیکورٹی فورسز جدید نگرانی نظام اور زمینی گشت کے ذریعے حساس مقامات پر مسلسل نظر رکھے ہوئے ہیں۔ذرائع کے مطابق واقعہ کے بعد پورے علاقے کو گھیرے میں لے کر تلاشی کارروائی جاری رکھی گئی ہے تاکہ کسی بھی ممکنہ خطرے کو بروقت ناکام بنایا جا سکے۔
