سمت بھارگو
راجوری//ضلع راجوری کے سب ڈسٹرکٹ ہسپتال درہال ملکان میں ناقص ورک کلچر اور ڈیوٹی اوقات کی خلاف ورزی پر چودہ اہلکاروں کے خلاف محکمانہ کارروائی کا آغاز کر دیا گیا ہے۔ یہ کارروائی چیف میڈیکل آفیسر (سی ایم او) راجوری ڈاکٹر منوہر لال رانا کی جانب سے ایک اچانک معائنہ کے بعد عمل میں لائی گئی۔تفصیلات کے مطابق 6 مئی کو دوپہر تقریباً 2 بج کر 45 منٹ پر ہسپتال کا اچانک دورہ کیا گیا، جس دوران بائیومیٹرک حاضری نظام کی جانچ کی گئی۔
معائنے میں یہ بات سامنے آئی کہ متعدد ملازمین مقررہ اوقات کی پابندی نہیں کر رہے تھے، کچھ اہلکار تاخیر سے ڈیوٹی پر پہنچ رہے تھے جبکہ بعض ڈیوٹی مکمل ہونے سے قبل ہی ہسپتال چھوڑ کر جا رہے تھے۔سی ایم او ڈاکٹر منوہر لال رانا نے بتایا کہ اس قسم کی غیر ذمہ دارانہ روش سے مریضوں کی دیکھ بھال شدید متاثر ہو رہی ہے۔ انہوں نے کہا کہ اس رویے کی وجہ سے طبی سہولیات کی فراہمی میں تاخیر ہوتی ہے اور عوام کو مشکلات کا سامنا کرنا پڑتا ہے، جو کہ کسی بھی صورت قابل قبول نہیں۔انہوں نے مزید کہا کہ متعلقہ چودہ اہلکاروں کو وضاحتی نوٹس جاری کیے گئے ہیں اور انہیں ہدایت دی گئی ہے کہ وہ دو دن کے اندر اپنی تحریری وضاحت پیش کریں۔ ساتھ ہی یہ بھی خبردار کیا گیا ہے کہ اگر مقررہ وقت میں جواب جمع نہ کرایا گیا تو مزید سخت محکمانہ کارروائی عمل میں لائی جائے گی۔سی ایم او کے مطابق ابتدائی طور پر ایک دن کی تنخواہ بطور جرمانہ کاٹنے کا فیصلہ کیا گیا ہے، جو مئی 2026 کی تنخواہ سے منہا کر کے ریڈ کراس فنڈ میں جمع کی جائے گی۔ اس کے علاوہ اس کٹوتی کو متعلقہ ملازمین کے سروس ریکارڈ میں بھی درج کیا جائے گا تاکہ آئندہ کے لیے یہ ایک مثال قائم ہو۔انہوں نے واضح کیا کہ اگر مستقبل میں اس طرح کی لاپرواہی یا ڈیوٹی سے غفلت دہرائی گئی تو جموں و کشمیر سول سروس رولز کے تحت مزید سخت سزائیں دی جائیں گی۔محکمہ صحت کی اس کارروائی کو عوامی حلقوں میں سراہا جا رہا ہے اور امید ظاہر کی جا رہی ہے کہ اس سے ہسپتالوں میں نظم و ضبط بہتر ہوگا اور مریضوں کو بروقت اور معیاری طبی سہولیات فراہم کی جا سکیں گی۔
