عظمیٰ نیوز سروس
جموں//جموں و کشمیر میں دہشت اورملی ٹینسی کا دور ختم ہونے پر زور دیتے ہوئے لیفٹیننٹ گورنر منوج سنہا نے پیر کو خبردار کیا کہ پرانے ملی ٹینسی کے ماحولیاتی نظام کی باقیات کی نمائندگی کرنے والوں کو یہ سمجھ لینا چاہیے کہ مرکز کے زیر انتظام علاقے میں ملی ٹینسی یا اس کے حامیوں کے لیے اب کوئی محفوظ جگہ نہیں ہے۔سنہا نے کہا کہ جاری کارروائی اس وقت تک جاری رہے گی جب تک ملی ٹینسی کی حمایت کرنے والے پورے نیٹ ورک کو ختم نہیں کر دیا جاتا، اور یقین دلایا کہ جموں و کشمیر انتظامیہ اس بات کو یقینی بنانے کے لیے پرعزم ہے کہ ملی ٹینسی ے متاثرہ خاندان عزت اور احترام کے ساتھ زندگی گزار سکیں۔ایل جی نے کہا”اس کے ساتھ ہی، ان لوگوں کو مخاطب کرنا ضروری ہے جو اب بھی پرانے ملی ٹینسی کے ماحولیاتی نظام کی باقیات کی نمائندگی کرتے ہیں یا جو تنازعات سے فائدہ اٹھاتے ہیں، میں انہیں واضح طور پر بتانا چاہتا ہوں کہ جموں و کشمیر میں دہشت اور ملی ٹینسی کا دور ختم ہو چکا ہے۔
ہر کوئی جانتا ہے کہ ان نیٹ ورکس کی حفاظت کس نے کی تھی، لیکن وہ حفاظتی ڈھانچہ اب منہدم ہو چکا ہے،” ۔سنہا نے یہ بات جموں کے کنونشن سنٹر میں ملی ٹینسی کا نشانہ بننے والوں کے 37 قریبی رشتہ داروں کو تقرری خطوط کے حوالے کرتے ہوئے کہی۔سنہانے کہا کہ وہ حفاظتی ڈھانچہ جو کبھی ملی ٹینسی کے نیٹ ورک کو ڈھال بناتا تھا منہدم ہو گیا ہے، اور اس میں ملوث افراد احتساب سے بچ نہیں سکیں گے۔انہوں نے زور دے کر کہا کہ ایسے عناصر کی نشاندہی اور انہیں سرکاری ملازمت سے ہٹانے کا عمل جاری رہے گا، اور انہیں قانون کے تحت کارروائی کا سامنا کرنا پڑے گا۔متاثرین کی حالت زار پر روشنی ڈالتے ہوئے گورنر نے کہا کہ انصاف کا انحصار اس بات پر بھی ہے کہ معاشرہ ان کی کہانیوں کو یاد رکھتا ہے، ان کے دکھوں کو تسلیم کرتا ہے اور ان کے آنسو پونچھتا ہے۔انہوں نے کہا کہ انتظامیہ ان خاندانوں کے لیے یادداشت، وقار اور عزت کا ایک نیا باب لکھنے کی کوشش کر رہی ہے جنہیں کبھی فراموش کر دیا گیا تھا۔سنہا نے کہا کہ اس بات کو یقینی بنانے کے لیے پوری مستعدی پر عمل کیا جا رہا ہے کہ فوائد صرف حقیقی متاثرین تک پہنچیں، جس میں ضلعی سطح پر افسران، سیکرٹریٹ اور ایجنسیوں جیسے کہ سی آئی ڈی شامل ہیں۔انہوں نے مزید کہا کہ ملی ٹینسی سے متاثرہ خاندانوں کے اہل افراد کو بھی بغیر کسی امتیاز کے اگنی پتھ سکیم کے فوائد حاصل کرنے چاہئیں۔موجودہ لمحے کو ایک فیصلہ کن موڑ قرار دیتے ہوئے، انہوں نے سماج ے بااثر طبقوں پر زور دیا کہ وہ جموں و کشمیر کے نوجوانوں کے روشن مستقبل کو محفوظ بنانے کی کوششوں کی حمایت کریں۔
انہوں نے کہا، “نوجوان ایک بہتر زندگی کی خواہش رکھتے ہیں، اور یہ ہماری اجتماعی ذمہ داری ہے کہ ہم ان کی خواہشات کے مطابق مواقع فراہم کریں۔”ماضی کا ذکر کرتے ہوئے سنہا نے کہا کہ ملی ٹینسی سے تباہ ہونے والے خاندانوں کو دہائیوں تک نظر انداز کیا گیا جبکہ دہشت گرد نیٹ ورکس سے منسلک عناصر کو مبینہ طور پر تحفظ اور فوائد حاصل ہوئے۔گورنر نے اس بات کو یقینی بنانے کے اپنے عزم کا اعادہ کیا کہ ملی ٹینسی کا شکار ہونے والے ہر خاندان کو انصاف، نوکریاں، پہچان اور مدد ملے جو وہ برسوں کی تکالیف کے بعد مستحق ہیں۔انہوں نے کہا” ملی ٹینسی سے براہ راست تعلق رکھنے والوں کو ملازمت سے برخاست کیا جا رہا ہے، جب کہ دہائیوں سے نظر انداز کیے گئے ملی ٹینسی کے شکار خاندانوں کو ان کے معاشی اور سماجی وقار کو محفوظ بنانے کے لیے سرکاری ملازمتیں دی جا رہی ہیں۔ میں اسے محض پالیسی میں اصلاح کے طور پر نہیں دیکھتا، بلکہ ایک نئے جموں و کشمیر کے لیے ایک نئے اخلاقی اعلان کے طور پر دیکھتا ہوں،” ۔ لیفٹیننٹ گورنر نے پیر کو کہا کہ 2025 سے اب تک 438 ملی ٹینسی کا شکار خاندانوں کو تقرری کے خطوط جاری کیے گئے ہیں۔
