عظمیٰ نیوز سروس
نئی دہلی// وزیر اعلیٰ عمر عبداللہ نے جمعہ کو مرکزی جل شکتی وزیر سی آر پاٹل سے ملاقات کی اور مرکز کے زیر انتظام علاقے میں جل جیون مشن کے نفاذ سے متعلق اہم امور پر تبادلہ خیال کیا۔انہوں نے رکی ہوئی سکیموں کو دوبارہ شروع کرنے کے لیے زیر التوا مرکزی فنڈز کی جلد اجرائی پر زور دیا۔ عبداللہ کے ساتھ وزیر جاوید احمد رانا بھی تھے۔ ایکس ؎پر ایک پوسٹ میں، وزیر اعلیٰ کے دفترنے کہا، “وزیر اعلیٰ نے نئی دہلی میں مرکزی وزیر جل شکتی سی آر پاٹل کے ساتھ ایک میٹنگ کی اور جموں و کشمیر میں جل جیون مشن کے نفاذ سے متعلق کلیدی امور پر تبادلہ خیال کیا۔ عبداللہ نے یقین دلایا کہ جموں و کشمیر حکومت بروقت عمل درآمد، قریبی نگرانی اور مشن کے اہداف کے حصول کو یقینی بنائے گی، نیز حکومت کی مسلسل حمایت کے ساتھ دیہی گھرانوں کے لیے ‘ہر گھر جل’ کو حاصل کرنے کے عزم کا اعادہ کرے گی۔ پاٹل نے X پر پوسٹ میں کہا کہ انہوں نے عمر عبداللہ کے ساتھ جل شکتی کی وزارت کے ساتھ ساتھ جموں و کشمیر سے متعلق مختلف اہم مسائل پر بات چیت کی۔ جموں و کشمیر کی جل شکتی وزارت کے اعداد و شمار کے مطابق، 8 دسمبر تک 81.22 فیصد دیہی گھرانوں کے پاس نل کے پانی کے کنکشن تھے۔ اکتوبر میں، جموں و کشمیر حکومت نے اسمبلی کو مطلع کیا کہ جے جے ایم کے تحت تمام واٹر سپلائی سکیموں کو مکمل کرنے کے لیے اضافی 6,254 کروڑ روپے درکار ہوں گے۔
