عظمیٰ نیوز سروس
پٹنہ// نیتیش کمار نے بدھ راج بھون پہنچ کر وزارتِ اعلیٰ کے عہدے سے استعفیٰ دے دیا۔ اس کے ساتھ ہی انہوں نے گورنر عارف محمد خان کو این ڈی اے کے تمام اراکینِ اسمبلی کی حمایت کا خط سونپا اور ریاست میں نئی حکومت بنانے کا دعویٰ پیش کیا۔این ڈی اے کے لیجیلیٹیو پارٹی لیڈر منتخب ہونے کے بعد نیٹیش کمار نے راج بھون جا کر گورنر سے ملاقات کی۔ این ڈی اے کے اجلاس میں بی جے پی لیڈر سمرات چوہدری نے نیٹیش کمار کے نام کی تجویز پیش کی، جس پر اتفاقِ رائے سے منظوری دی گئی۔نیٹیش کمار اب دسویں بار بہار کے وزیر اعلیٰ کی حیثیت سے حلف اٹھائیں گے۔ جمعرات کو پٹنہ کے گاندھی میدان میں حلف برداری کی تقریب منعقد کی جائے گی، جس کی تیاریاں زور و شور سے جاری ہیں۔ نیٹیش کمار خود بھی منگل کو گاندھی میدان پہنچے اور انتظامات کا جائزہ لیا۔این ڈی اے کے کئی بڑے رہنما بھی اس تقریب میں شامل ہوں گے۔ یاد رہے کہ اسمبلی انتخابات کے نتائج 14 نومبر کو اعلان کیے گئے تھے، جس میں این ڈی اے نے شاندار کارکردگی دکھاتے ہوئے کل 202 سیٹوں پر کامیابی حاصل کی۔ این ڈی اے کے اتحادی بی جے پی نے 89 سیٹوں پر شاندار جیت حاصل کی اور ریاست کی سب سے بڑی پارٹی بن کر ابھری۔ دوسری پوزیشن نیتیش کمار کی پارٹی جے ڈی یو کی رہی، جس نے 85 سیٹوں پر کامیابی حاصل کی۔اسی کے ساتھ چیراغ پاسوان کی پارٹی لوک جن شکتی (رام ویلاس) کا اسٹرائیک ریٹ بھی بہتر رہا۔ پارٹی نے 29 سیٹوں پر انتخابات لڑے اور 19 پر کامیابی حاصل کی۔ یہ این ڈی اے میں تیسرے نمبر کی سب سے بڑی پارٹی بنی جبکہ پورے بہار میں چوتھے نمبر پر رہی۔ اس کے علاوہ مرکزی وزیر جیتن رام مانجھی کی پارٹی ہندوستانی عوام مورچہ (HAM) کو 5 اور اوپندر کشواہا کی RLM کو 4 سیٹیں ملیں۔ دوسری طرف مہاگٹھ بندھن کو صرف 35 سیٹوں پر کامیابی حاصل ہوئی۔
