حسین محتشم
پونچھ// پونچھ کے دشنامی اکھاڑہ سے جمعرات کی صبح چھڑی مبارک شری وشیواتما آنند سرسوتی جی مہاراج کی قیادت میں منڈی میں واقع بڈھا امرناتھ مندر کے لئے روانہ ہوئی۔یہ چھڑی مبارک مختلف روایتی راستوں سے ہوتے ہوئے بڈھا امرناتھ مندر پہنچ گئی جہاں اس کی پوجن کی گئی۔قبل ازیں پونچھ کے دشنامی اکھاڑہ میں چھڑی مبارک کی پوجن کی گئی جس میں ممبر اسمبلی اعجاز جان ضلع مجسٹریٹ پونچھ، پولیس اور فوج کے افسروں کے علاوہ سینکڑوں عقیدت مندوں نے شرکت کی۔اس دوران جموں و کشمیر پولیس کے جوانوں نے چھڑی مبارک کو سلامی دے کر منڈی کے لئے روانہ کیا۔پونچھ سے منڈی تک کے 22 کلو میٹر کے راستے پر سخت سیکورٹی بندوبست کے ساتھ ساتھ یاتریوں کے لئے کھانے پینے کے علاوہ دیگر سہولیات کا بھی کا بھر پور انتظام کیا گیا ہے۔اس عقیدت مندوں نے بات کرتے ہوئے بتایا کہ چھڑی مبارک بڈھا امرناتھ مندر کے لئے صبح ساڑے نو بجے روانہ ہوئی۔انہوں نے کہا کہ ہم نے پوجن میں امن و آشتی، بھائی چارے اور ملک کی ترقی کے لئے دعا کی۔بتادیں کہ شری بڈھا امرنات یاترا 28 جولائی 2025 سے شروع ہوئی تھی اور حکام نے دس دنوں تک جاری رہنے والی اس یاترا کے یاتریوں کے لئے موبائل بیت الخلا، لنگر، پانی اور بجلی وغیرہ کا معقول بندو بست کیا گیا ہے۔قابل ذکر ہے کہ پونچھ کے منڈی علاقے میں واقع بھگوان شیو کے نام وقف بابا بڈھا امرناتھ مندر جموں کے قدیم ترین مندروں میں شمار کیا جاتا ہے۔گرچہ اس مندر میں سال بھر عقیدت مندوں کا آنا جانا رہتا ہے تاہم یاترا کے دوران یاتریوں کی غیر معمولی بھیڑ رہتی ہے۔
