عظمیٰ ویب ڈیسک
جھارکھنڈ /جھارکھنڈ کے سابق وزیر اعلیٰ اور راجیہ سبھا ایم پی شیبو سورین کا آج صبح انتقال ہو گیا۔ انہوں نے دہلی کے سر گنگا رام اسپتال میں آخری سانس لی۔ وہ 81 سال کے تھے۔ یہ اطلاع سر گنگا رام اسپتال میں نیفرولاجی شعبہ کے چیئرمین ڈاکٹر اے۔ کے۔ بھلّا نے دی۔ انہوں نے بتایا کہ پیر کی صبح 8.56 بجے شیبو سورین کا انتقال ہوا۔
ڈاکٹر اے۔کے۔ بھلا نے بتایا کہ زیادہ عمر ہونے اور بائی پاس سرجری کی وجہ سے شیبو سورین کی صحت ٹھیک ہونے میں وقت لگ رہا تھا۔ ساتھ ہی وہ ڈائبٹک بھی تھے۔ ان کو گردے اور پھیپھڑے کی طویل عرصے سے بیماری تھی۔ حال ہی میں انہیں ’برین اسٹروک‘ بھی آیا تھا، اس کی وجہ سے ان کی طبیعت مسلسل بگڑتی جا رہی تھی۔والد کے انتقال پر گہرے صدمے کا اظہار کرتے ہوئے وزیر اعلیٰ ہیمنت سورین نے سوشل میڈیا سائٹ ’ایکس‘ پر لکھا، ’’معزز دِشوم گرو جی ہم سبھی کو چھوڑ کر چلے گئے ہیں۔ آج میں صفر ہو گیا ہوں…‘‘۔
واضح رہے کہ جسم کے حصے میں برین اسٹروک ہونے سے پیرالائسس کی شکایت کے بعد قد آور رہنما شیبو سورین کو سر گنگا رام اسپتال میں داخل کرایا گیا تھا۔ تبھی سے وہ اسپتال میں آئی سی یو میں وینٹی لیٹر پر تھے۔ اس کی وجہ سے جھارکھنڈ کے وزیر اعلیٰ اور ان کے بیٹے ہیمنت سورین تقریباً ایک ہفتے سے دہلی میں ہی رکے ہوئے تھے۔
شیبو سورین کی خیریت دریافت کرنے کے لیے اسپتال میں رہنماؤں کا آنا جانا لگا ہوا تھا۔ لیکن جھارکھنڈ کے اس عظیم رہنما نے اب آخری سانس لے لی ہے۔ ان کے انتقال سے جھارکھنڈ اور سیاسی دنیا کو ایک گہرا جھٹکا لگا ہے۔ انہوں نے اپنا ایک عظیم رہنما کھو دیا ہے۔ شیبو سورین کے انتقال پر کئی سیاسی رہنماؤں نے اپنے گہرے صدمے کا اظہار کیا ہے۔
عظیم قبائلی رہنما شیبو سورین نے 38 برسوں سے زیادہ وقت تک جھارکھنڈ مکتی مورچہ کی قیادت کی۔ جھارکھنڈ ریاست کے لیے انہوں نے طویل وقت تک تحریک چلائی اور تین مرتبہ جھارکھنڈ کے وزیر اعلیٰ بنے۔ پہلی بار 2 مارچ 2005 کو وزیر اعلیٰ عہدے کا حلف لیا، لیکن اکثریت ثابت نہیں کرنے کے سبب 12 مارچ 2005 کو ہی استعفیٰ دینا پڑا۔ پہلی بار وہ 10 دن کے وزیر اعلیٰ رہے۔ دوسری بار 27 اگست 2008 کو وہ وزیر اعلیٰ بنے اور 19 جنوری 2009 تک اس عہدے پر رہے۔ تیسری بار 30 دسمبر 2009 کو وزیر اعلیٰ کا عہدہ سنبھالا اور یکم جون 2010 تک رہے۔
شیبو سورین 8 مرتبہ لوک سبھا کے رکن منتخب ہوئے۔ تین مرتبہ راجیہ سبھا ایم پی کی بھی انہوں نے ذمہ داری سنبھالی۔ مرکزی وزیر کے طور پر بھی انہوں نے ملک کو اپنی خدمات دیں۔ شیبو سورین جھارکھنڈ کی سیاست کی سب سے بڑی شخصیت رہے اور ملک کی سیاست میں بھی ان کا خوب بول بالا رہا۔ جھارکھنڈ میں انہیں ’دِشوم گرو‘ (ملک کا گرو) کہہ کر پکارا جاتا رہا۔
