سری نگر میں این ڈی پی ایس ایکٹ کے تحت لاکھوں روپیے مالیت کی غیر منقولہ جائیداد ضبط:پولیس

عظمیٰ ویب ڈیسک
سری نگر/منشیات فروشوں کے خلاف سخت کارروائیاں جاری رکھتے ہوئے پولیس نے سری نگر میں دو منشیات فروشوں کی قریب 75 لاکھ روپیے مالیت کی رہائشی جائیداد کو این ڈی پی ایس ایکٹ کے تحت ضبط کر دیا۔ایک پولیس ترجمان نے اپنے ایک بیان میں کہا کہ منشیات کی لعنت سے نمٹنے اور منشیات کی اسمگلنگ میں معاونت کرنے والے بنیادی ڈھانچے کو ختم کرنے کے لیے ایک اہم اقدام میں، سری نگر پولیس نے نارکوٹک ڈرگس اینڈ سائیکو ٹراپک سبسٹنسز (این ڈی پی ایس) ایکٹ کے تحت تقریباً 75 لاکھ روپیے کی رہائشی جائیداد ضبط کی ہے۔
انہوں نے کہا کہ اراضی کے ساتھ ایک منزلہ رہائشی مکان پر مشتمل یہ جائیداد سری نگر کے اتھواجن میں واقع ہے اور یہ دو بدنام زمانہ منشیات فروش بھائیوں عرفان احمد گنائی اور اعجاز احمد گنائی پسران منظور احمد گنائی کے قبضے میں ہے۔ان کا کہنا ہے کہ دونوں افراد این ڈی پی ایس ایکٹ کے متعلقہ دفعات کے تحت پولیس اسٹیشن پانتھہ چوک میں درج ایف آئی آر 5/2025 اور ایف آئی آر نمبر 136/2024 میں ملوث ہیں۔
بیان میں کہا گیا کہ تحقیقات سے یہ بات سامنے آئی ہے کہ مذکورہ جائیداد، جو ملزموں کے والد کے نام پر رجسٹر ہے، منشیات کی ناجائز اسمگلنگ سے حاصل ہونے والی رقم سے حاصل کی گئی تھی۔انہوں نے کہا کہ این ڈی پی ایس ایکٹ کی دفعہ 68-E اور 68-F کے تحت کارروائی کرتے ہوئے، سری نگر پولیس نے قانونی کارروائی کے مطابق اس غیر منقولہ جائیداد کو باضابطہ طور پر ضبط کر دیا۔
پولیس ترجمان نے بتایا کہ مجاز اتھارٹی کی پیشگی اجازت کے بغیر اس جائیداد کو فروخت، منتقل یا دوسری صورت میں ڈیل نہیں کیا جا سکتا۔
انہوں نے کہا کہ ملزمین کی منشیات کی اسمگلنگ میں ملوث ہونے کی تاریخ ہے اور وہ بنیادی طور پر مقامی نوجوانوں کو ٹارگیٹ بنا رہے تھے جس سے صحت عامہ اور حفاظت کو شدید خطرہ لاحق تھا۔ان کا کہنا ہے کہ یہ کارروائی جموں و کشمیر پولیس کی جانب سے منشیات کے نیٹ ورکس کے خلاف جاری کریک ڈاؤن کا حصہ ہے، جس میں مالیاتی ڈھانچے کو ختم کرنے پر توجہ مرکوز کی گئی ہے۔انہوں نے کہا کہ سری نگر پولیس معاشرے سے منشیات کے استعمال کو ختم کرنے کے اپنے عزم میں ثابت قدم ہے۔