اننت ناگ کے کئی علاقوں میں ڈرون اڑنے پر عارضی پابندی عائد:پولیس

عظمیٰ ویب ڈیسک
سری نگر/سالانہ شری امرناتھ جی یاترا کے پیش نظر اننت ناگ پولیس نے کئی علاقوں میں ڈرون اڑانے پر عارضی طور پر پابندی عائد کر دی ہے۔واضح رہے کہ 38 دنوں پر محیط شری امرناتھ جی یاترا 3 جولائی سے شروع ہو کر 9 اگست کو رکشا بندھن کے موقع پر اختتام پذیر ہوگی۔یہ مقدس یاترا روایتی راستوں 48 کلو میٹر ننون پہلگام راستے اور 14 کلو میٹر بالتل راستے سے بہ یک وقت شروع ہوگی اور لیفٹیننٹ گورنر منوج سنہا 2 جولائی کو جموں کے بھگوتی نگر بیس کیمپ سے یاتریوں کے پہلے قافلے کو کشمیر کے لئے روانہ کریں گے۔
ایک پولیس ترجمان نے بتایا کہ اننت ناگ پولیس نے لینڈنگ سٹرپ تا پجتنگ،گورنمنٹ ڈگری کالج کھنہ بل تا پوتر گھپا اور ننون ، چندواری، شیش ناگ، پنجترنی اور پوتر گھپا علاقوں کو ڈورن اڑانے کے لئے عارضی طور پر’ریڈ زون‘قرار دیا ہے۔پولیس نے خبر دار کیا ہے کہ حکم کی خلاف ورزی کرنے والوں کے خلاف سخت قانونی کارروائی انجام دی جائے گی۔