عظمیٰ نیوزسروس
جموں// اپنی پارٹی کے سربراہ سید محمد الطاف بخاری نے حکمران جماعت پر الزام لگایا کہ وہ عوام کو ایک موثر حکومت فراہم کرنے، اُن کے مسائل کو حل کرنے ناکام ثابت ہوئی ہے حتاکہ وہ اپنے انتخابی وعدوں کو پورا کرنے میں ناکام ثابت ہوئی ہے۔اپنی پارٹی کے سربراہ نے مرکزی سرکار پر زور دیا ہے کہ جموں کشمیر کا ریاست کا درجہ بحال کرنے کےلئے فوری اقدامات کرے۔یہ باتیں سید محمد الطاف بخاری نے جموں میں پارٹی کے صوبائی اجلاس سے خطاب کرنے ہوئے کہیں۔ اس اجلاس کا مقصد جموں کشمیر کے موجودہ حالات کے حوالے سے بات چیت کرنا، پارٹی کی کارکردگی کا جائزہ لینا اور بعض تنظیمی امور پر تبادلہ خیالات کرنا تھا۔اجلاس میں جموں صوبے سے تعلق رکھنے والے پارٹی کے سینئر لیڈران اور سرکردہ کارکنان نے شرکت کی۔ اجلاس میں پارٹی لیڈران نے متذکرہ معاملات کے حوالے سے اپنے خیالات کا اظہار کیا اور کئی اہم فیصلے لئے۔ بخاری نے حکمران جماعت کو ایک اچھی حکومت فراہم کرنے میں ناکامی، نیز اس کے اپنے انتخابی وعدوں کو پورا نہ کرپانے پر اسے لتاڑا۔ انہوں نے مرکزی سرکار پر زور دیا کہ وہ جموں کشمیر میں عوامی اعتماد کو بحال کرنے اور اسے ریاست کا درجہ لوٹانے کےلئے اقدامات کرے۔انہوں نے کہا کہ ’’لوگ یہ دیکھ کر مایوس ہیں کہ حکمران جماعت ایک اچھی حکومت فراہم کرنے میں ناکام رہی ہے، اس حکومت نے اسمبلی مہم کے دوران عوام سے کیے گئے وعدوں کو بھی پورا نہیں کیا، مثال کے طور پر صارفین کو 300ونٹ مفت بجلی فراہم کرنے کے وعدہ کیا گیا تھا۔ اس طرح کے کئی دیگر وعدے بھی کئے گئے تھے لیکن حکومت اپنے ہی وعدوں کو پورا کرنے میں سراسر ناکام ثابت ہوگئی ہے‘‘۔سید محمد الطاف بخاری نے مرکزی حکومت پر زور دیا کہ وہ بغیر کسی تاخیر کے جموں و کشمیر میں بلدیاتی اور پنچایتی انتخابات کرائے ۔انہوں نے کہا ’’لوگوں کو بلدیاتی اور پنچایتی سطحوں پر اپنے نمائندے چُننے کا جمہوری حق بغیر کسی تاخیر کے فراہم کیا جانا چاہیے۔ مرکز کو بھی جموں اور کشمیر میں لوگوں کا اعتماد بحال کرنے کے لیے مطلوبہ اقدامات کرنے چاہئیں‘‘۔پارٹی اجلاس کے بعد سید محمد الطاف بخاری نے صحافیوں سے بات چیت کی۔ سوالات کے جواب دیتے ہوئے انہوں نے حکومت کی کارکردگی پر اپنے عدم اطمینان کا اظہار کیا۔انہوں نے کہا ’’بی جے پی ایسا برتاؤ کرتی ہے جیسے جموں و کشمیر میں اسی
جماعت کی حکومت ہے۔ اس کے برعکس بر سر اقتدار جماعت ایک اپوزیشن کی طرح برتاو کررہی ہے۔ بی جے پی ہر مسئلے پر شور و غوغا بپا کرتی ہے، ماسوائے ان مسائل کے جن کا سامنا عوام کو کرنا پڑ رہا ہے‘‘۔انہوں نے مزید کہا، ’’حکومت بنیادی مسائل تک کو بھی حل کرنے میں ناکام رہی ہے۔ اس کی ایک مثال جموں و کشمیر میں کان کنی کا مسئلہ ہے۔ پہلے مقامی لوگ محنت شاقہ کے ذریعے کان کنی کرتے تھے اور اپنا روزگار کماتے تھے۔ لیکن اب اُنہیں اس سے روک دیا گیا ہے اور ان کی جگہ باہر کے ٹھیکے داروں کو کان کنی کے ٹھیکے دیئے جارہے ہیں۔ اس کی وجہ سے قیمتیں آسمان کو چھو رہی ہیں۔ ایک لوٹ کھسوٹ جاری ہے۔ بی جے پی اور این سی دونوں لوٹ کھسوٹ کرنے والوں کے ساتھ ملی ہوئی۔ انہوں نے کہا کہ ’’اپنی پارٹی کی ان تمام مسائل پر نظر رکھے ہوئے ہے۔ ہم پہلے ان مسائل پر بات نہیں کرتے تھے کیونکہ ہم حکومت کو اس کے وعدے پورے کرنے کا موقعہ فراہم کرنا چاہتے تھے۔ لیکن اب آٹھ ماہ گزر چکے ہیں، لیکن حکومت ہر محاذ پر ناکام ثابت ہوگئی ہے۔‘‘
