عظمیٰ نیوز سروس
نئی دہلی//حیدر آباد کے بیگم پیٹ ہوائی اڈے کو بم سے اڑانے کی دھمکی ملی ہے۔ بدھ کی صبح ہوائی اڈہ انتظامیہ کو بم کی دھمکی والا ای میل ملنے کے بعد افرا تفری کا ماحول پیدا ہو گیا۔ اس کے بعد ہوائی اڈہ پر تحفظ کے سخت انتظامات کر دیئے گئے۔ تلنگانہ اسپیشل پروٹیشکن فورس (ٹی ایس پی ایف)، سنٹرل انڈسٹریل سیکوریٹی فورس (سی آئی ایس ایف) اور دیگر سلامتی ایجنسیاں حرکت میں آ گئی ہیں۔دھمکی ملنے کے بعد ہوائی اڈہ کے ملازمین اور اسٹاف کو احتیاط کے طور پر باہر نکالا گیا۔ سلامتی دستوں نے اسنفر ڈاگس اور بم ڈٹیکشن اسکواڈ کی مدد سے ہوائی اڈے کی جانچ شروع کر دی ہے۔ بم دھماکہ ماہرین اور سیکوریٹی اہلکار پورے ہوائی اڈے کی تلاشی لے رہے ہیں۔ ایئر پورٹ اتھاریٹی نے بھی ایمرجنسی رسپانس ٹیم کو تعینات کر دیا ہے۔بیگم پیٹ ڈویژن کے اے سی اپی کے مطابق دھمکی کی خبر صبح صبح ملی۔ اس کے بعد بم ڈسپوزل اسکواڈ کو ہوائی اڈے اور اس کے آس پاس علاقے کی جانچ کے لیے بھیجا گیا۔ انہوں نے بتایا کہ پولیس ہوائی اڈے کے ہر کونے کی باریکی سے جانچ کر رہی ہے کہ تاکہ یہ پتہ لگایا جا سکے کہ کہیں کوئی بم یا مشتبہ چیز تو نہیں ہے۔محکمہ سائبر کرائم نے اس معاملے کی جانچ شروع کر دی ہے۔ جانچ کنندگان دھمکی بھرے ای میل کو بھیجنے والے کی شناخت کرنے میں لگے ہوئے ہیں۔ فی الحال ہوائی اڈے پر حالات قابو میں ہیں لیکن سلامتی دستوں نے پوری طرح احتیاط برتنے کی ہدایت دی ہے۔ افسروں کا کہنا ہے کہ یہ کوئی پرینک میل بھی ہو سکتا ہے لیکن تحفظ کے لحاظ سے کسی بھی طرح کی لاپروائی سے بچا جا رہا ہے۔واضح رہے کہ اس سے پہلے جرمنی سے حیدر آباد کے لیے اڑان بھرنے والے لفتھانسا کے طیارہ کو بھی بم کی دھمکی ملی تھی۔ اس کی وجہ سے لفتھانسا کے طیارہ کو واپس فرینکفرٹ ہوائی اڈے لے جایا گیا اور قریب 20 گھنٹے کی تاخیر کے بعد اس نے پھر سے اڑان بھری جس سے مسافروں کو کافی پریشانی کا سامنا کرنا پڑا۔ طیارہ کو راجیو گاندھی بین الاقوامی ہوائی اڈے پر اترنے کی اجازت نہیں ملی۔ اڑان نمبر ایل ایچ 752 نے اتوار کو دوپہر ڈھائی بجے فرینکفرٹ سے پرواز کی تھی اور اسے پیر کی صبح 6 بجے حیدر آباد پہنچنا تھا لیکن بم کی دھمکی ملنے کی وجہ سے اس طیارہ کو واپس فرینکفرٹ لے جایا گیا۔
