عظمیٰ نیوز سروس
جموں// نیشنل انویسٹی گیشن ایجنسی (این آئی اے)نے پی ڈی پی لیڈر اور ایم ایل اے وحید الرحمان پرہ کے لیے ضمانت کی شرائط میں نرمی کی مخالفت کرتے ہوئے کہا ہے کہ وہ قانون کی پاسداری کرنے والے شہری نہیں ہیں اور ان کے خلاف قومی سلامتی سے متعلق جرائم میں الزامات عائد کئے گئے ہیں۔پرہ کی طرف سے جموں و کشمیر سے باہر جانے کی اجازت دینے کے لیے ضمانت کی شرائط میں نرمی کی درخواست کے چار صفحات پر مشتمل جواب میں، این آئی اے نے اس کیس کا تفصیلی بیان دیا اور کہا کہ اس درخواست کو خارج کرنے کی ضرورت ہے کیونکہ ملزم قانون کی گرفت سے بھاگ سکتا ہے۔پرہ کو این آئی اے کی عدالت نے ضمانت دی تھی لیکن عدالت سے اجازت لیے بغیر مرکز کے زیر انتظام علاقہ نہ چھوڑنے کی ہدایت دی گئی تھی۔پی ڈی پی ایم ایل اے، جسے این آئی اے نے پہلی بار 25 نومبر 2020 کو گرفتار کیا تھا، کو 9 جنوری 2021 کو ضمانت مل گئی۔ این آئی اے نے کہا، “ملزم، وحید الرحمان پرہ، قانون کی پاسداری کرنے والا شہری نہیں ہے اور قومی سلامتی کو متاثر کرنے والے سنگین جرائم میں ملوث ہے۔انہوں نے کہا”جموں و کشمیر کے یونین ٹیریٹری سے باہر سفر کرنے کی اجازت طلب کرنے والی کسی بھی درخواست کو مقدمے کی سماعت کے نازک مرحلے کے دوران انصاف سے بچنے کی ایک حسابی کوشش کے طور پر دیکھا جانا چاہیے۔”ایجنسی نے استدلال کیا کہ ضمانت کی شرائط میں کسی بھی قسم کی نرمی سے پرہ کے قانونی کارروائی سے بچنے اور جاری مقدمے کو روکنے کے ارادے کے بارے میں سنگین خدشات پیدا ہوں گے۔
