شری ماتا ویشنودیوی درشن کیلئے | ’’ سی سی ٹی وِی سرویلنس سسٹم اور اِنٹگریٹیڈ کمانڈ اینڈ کنٹرول سینٹر‘‘ کا اِفتتاح کیا

کٹراہ//لیفٹیننٹ گورنر منوج سِنہا نےشری ماتا ویشنو دیوی شرائین کے لئے جدید ترین ’’سی سی ٹی وِی سرویلنس سسٹم اور اِنٹگریٹیڈ کمانڈ اینڈ کنٹرول سینٹر‘‘ کا اِفتتاح کیا جو یاتریوں کی حفاظت، سکیورٹی اور درشن کے لئے جدید ٹیکنالوجی پر مبنی ایک اہم قدم ہے۔اُنہوں نے کہا ،’’یہ جدید ٹیکنالوجی حقیقی وقت میں مانیٹرنگ اور ہجوم کے اِنتظام کو ممکن بنائے گی جس سے عقیدت مندوں کے لئے یاترا کا تجربہ محفوظ، منظم اور آسان ہو گا۔‘‘لیفٹیننٹ گورنرنے مزید کہا کہ،’’اِس سسٹم سے حاصل ہونے والی معلومات ایمرجنسی حالات میں فوری ردِّعمل کو یقینی بنائیں گی۔ کمانڈ اینڈ کنٹرول اِنفراسٹرکچر میں شامل اے آئی پر مبنی نگرانی کا نظام مکمل صورتحال سے آگاہی فراہم کرے گا، آپریشن کو بہتر بنائے گااور ہنگامی خدمات سے فوری رابطہ ممکن بنائے گا۔‘‘اِس بڑے پروجیکٹ کے تحت ایک مرکزی اِنٹگریٹیڈ کمانڈ اینڈ کنٹرول سینٹر (آئی سی سی سی ) کٹرا میں قائم کیا گیا ہے جبکہ یاترا راستے میں 7 ذیلی کنٹرول مراکز مقامی نگرانی کے لئے قائم کئے گئے ہیں جو چوبیس گھنٹے نگرانی کو یقینی بنائیں گے ۔شرائین ایئریا میںزائد اَز700 کیمرے نصب کئے گئے ہیں جن میں 170 جدید آئی پی کیمرے اور 500 سے زائد پہلے سے موجود کیمروں کا انضمام شامل ہے جس میں کیمرے تمام اہم، حساس اور رَش والے مقامات جیسے داخلی وخارجی مقامات، اِجتماع گاہوں اور یاترا ٹریک پر نصب کئے گئے ہیں۔اِس سسٹم میں اے آئی پر مبنی تجزیات اور جدید ٹیکنالوجی کے میکانزم جیسے اشار وں کی شناخت ، گاڑیوں کی نمبر پلیٹ شناخت ( اے این پی آر )،چہرہ شناسی ،داخل اندازی کا پتہ لگانے کا نظام ، کرائوڈ مینجمنٹ ٹولز بھی شامل ہیں۔سی اِی او ،شری ماتا ویشنو دیوی شرائین بورڈ اَنشل گرگ نے اِنٹگریٹیڈ کمانڈ اینڈ کنٹرول سینٹر کی تکنیکی خصوصیات پر ایک تفصیلی پرزنٹیشن پیش کی۔اُنہوں نے بتایا کہ یہ سینٹر خودکار الرٹس، بھیڑ بھاڑ، راستے کی بندش، یا لینڈ سلائیڈز جیسی ایمرجنسی صورتحال کے بارے میں فوری اطلاعات فراہم کرے گا۔لیفٹیننٹ گورنر نے سینٹر میں موجود اِنجینئروںاور آپریشنل عملے سے بھی بات چیت کی۔اُنہوں نے سینر کی اِفادیت کو زیادہ سے زیادہ بڑھانے کے لئے عملے کی باقاعدہ تربیت اور سکیورٹی ایجنسیوں و دیگر شراکت داروں کے ساتھ قریبی ہم آہنگی ضروری ہے تاکہ سینٹر کی مکمل صلاحیت سے فائدہ اٹھایا جا سکے۔‘‘ یہ بات قابلِ ذِکر ہے کہ شری ماتا ویشنو دیوی شرائین بورڈ نے حال ہی میں یاترا کے اِنتظام کے لئے تعینات سیکورٹی ایجنسیوں کو جدیدسیکورٹی آلات فراہم کئے ہیں جن میں ایکسرے بیگیج سکینر،دروازہ نما میٹل ڈیٹیکٹر،ہینڈ ہیلڈ میٹل ڈیٹیکٹر،گاڑیوں کی تلاشی کے آلات شامل ہیںجو گزشتہ برس لیفٹیننٹ گورنر کی ہدایات پر کی گئی مشترکہ سکیورٹی جائزہ کاروائی کا نتیجہ ہیں۔اِس موقعہ پر ممبر شری ماتا ویشنودیوی شرائین بورڈ ڈاکٹر اشوک بھان ، آئی جی پی جموں بھیم سین توتی، ضلع ترقیاتی کمشنر ریاسی ندھی ملک، پولیس، سکیورٹی ایجنسیوں اور شرائین بورڈ کے دیگر سینئر اَفسران بھی موجود تھے۔