سری نگر میں ٹریفک پولیس کا کریک ڈاؤن، درجنوں موٹر سائیکل ضبط

عظمیٰ ویب ڈیسک
سری نگر/سری نگر شہر میں ٹریفک پولیس نے ٹریفک قوانین کی خلاف ورزی، خطرناک کرتب بازی، اور غیر قانونی ڈرائیونگ کے خلاف بھرپور کارروائی شروع کر دی ہے۔ شہر کے مختلف علاقوں میں جاری چیکنگ مہم کے دوران درجنوں گاڑیوں اور موٹر سائیکل سواروں کے خلاف چالان کاٹے کیے گئے جبکہ متعدد موٹر سائیکلوں کو ضبط بھی کیا گیا ہے۔
ٹریفک پولیس کے ایک سینئر افسر نے یو این آئی کو بتایا کہ گزشتہ دو روز کے دوران شہر کے مختلف علاقوں میں خصوصی ناکہ چیکنگ کے دوران ٹریفک قوانین کی سنگین خلاف ورزیوں میں ملوث نوجوانوں کو موقع پر ہی روکا گیا اور ان کے خلاف سخت کارروائی عمل میں لائی گئی۔
افسر کے مطابق، ’ہم نے کئی نوجوانوں کو بغیر ہیلمٹ، بغیر ڈرائیونگ لائسنس، اور یہاں تک کہ کم عمر بچوں کو موٹر سائیکل چلاتے ہوئے پایا۔ کئی نوجوان تیز رفتاری اور سڑکوں پر کرتب بازی کرتے ہوئے پائے گئے، جو نہ صرف ان کی اپنی جان کے لیے خطرہ ہے بلکہ دیگر شہریوں کے لیے بھی مہلک ثابت ہو سکتا ہے۔‘
ریاض احمد نامی ایک ذی عزت شہری نے یو این آئی سے بات کرتے ہوئے کہا، ’عید الاضحیٰ کے موقع پر والدین اپنے کم عمر بچوں کو گاڑیاں اور موٹر سائیکل چلانے کی اجازت دے رہے ہیں، جس کا خمیازہ ہمیں سڑک حادثات کی صورت میں بھگتنا پڑ رہا ہے۔ صرف پچھلے تین دنوں کے دوران شہر میں کئی خوفناک حادثات رونما ہوئے ہیں، جن میں متعدد نوجوان زخمی ہو چکے ہیں۔‘انہوں نے زور دیا کہ اب وقت آ گیا ہے کہ قانون نافذ کرنے والے ادارے سختی سے کام لیں اور والدین کو بھی ذمہ داری کا احساس دلائیں۔
ٹریفک پولیس نے عوام سے اپیل کی ہے کہ وہ قانون کا احترام کریں، کم عمر بچوں کو گاڑیاں چلانے سے روکیں، اور ٹریفک کے اصولوں کی پاسداری کر کے نہ صرف اپنی بلکہ دوسروں کی زندگیوں کو بھی محفوظ بنائیں۔ پولیس کا کہنا ہے کہ آنے والے دنوں میں یہ مہم مزید سخت کی جائے گی، اور قانون شکنی میں ملوث افراد کے خلاف بلا امتیاز کارروائی جاری رکھی جائے گی۔