وزیر اعظم نریندرمودی ریاسی پہنچے،چناب ریل برج کا دورہ کیا

عظمیٰ ویب ڈیسک
سرینگر/ وزیر اعظم نریندر مودی دنیا کے سب سے اونچے ریل پل ‘چناب ریل پل’ کا افتتاح کرنے کے لئے جموں و کشمیر کے ضلع ریاسی پہنچے۔ریاسی پہنچنے پر سب سے پہلے انہوں نے چناب ریل برج کا دورہ کیا اور اس دوران ریلوے بورڈ کے چیف ایگزیکیٹو افسر ( سی ای او) ستیش کمار بھی ان کے ہمراہ تھے۔وزیر اعظم نے اودھم پور –سری نگر – بارہمولہ ریل لنک کے پروجیکٹ ٹیم کے ساتھ بھی بات چیت کی اور اس موقع پر وزیر اعلیٰ عمر عبداللہ اور مرکزی وزرا ڈاکٹر جیتندرا سنگھ اور اشونی ویشنو بھی موجود تھے۔
وزیر اعظم آج کٹرہ – سری نگر وندے بھارت ٹرین کو روانہ کریں جس سے ملک کی ریلوے کی تاریخ میں ایک نیا باب رقم ہوگا۔وہ مختلف سڑک منصوبوں کا بھی سنگ بنیاد رکھیں گے اور ان کا افتتاح کریں گے تاکہ بالخصوص سرحدی علاقوں میں “لاسٹ مائل کنیکٹیوٹی” کو فروغ دیا جا سکے۔ان منصوبوں میں رفیع آباد سے کپواڑہ تک قومی شاہراہ 701 کی توسیع، اور شوپیاں بائی پاس روڈ (این ایچ 444) کی تعمیر شامل ہے، جن کی مجموعی لاگت تقریباً 1,952 کروڑ روپے ہے۔
سری نگر میں نیشنل ہائی وے 1 پر سنگرامہ جنکشن اور نیشنل ہائی وے 44 پر بمنہ جنکشن پر دو فلائی اوورز کا افتتاح بھی وزیر اعظم کریں گے، جس سے ٹریفک کی روانی بہتر ہوگی اور شہریوں کو سہولت ملے گی۔
وزیر اعظم شری ماتا ویشنو دیوی انسٹی ٹیوٹ آف میڈیکل ایکسیلنس کا بھی سنگ بنیاد رکھیں گے، جو کہ ضلع ریاسی کا پہلا میڈیکل کالج ہوگا۔ 350 کروڑ روپے کی لاگت سے بننے والا یہ ادارہ خطے کے صحت کے نظام کو نمایاں طور پر مضبوط کرے گا۔