سیاحت کے احیاء کی حمایت میں قوم کو متحد ہونا ہوگا: تنویر صادق

عظمیٰ ویب ڈیسک
سری نگر/نیشنل کانفرنس کے ترجمانِ اعلیٰ اور ایم ایل اے زیڈی بل تنویر صادق نے جموں و کشمیر کے عوام کی استقامت اور حوصلے کو سراہتے ہوئے زور دیا ہے کہ اب وقت آ گیا ہے کہ وادی میں سیاحت کے مکمل احیاء کے لیے پوری قوم متحد ہو جائے۔
تنویر صادق نے یہ باتیں ڈل جھیل کے اندرونی علاقوں کے تفصیلی دورے کے دوران ہاؤس بوٹ مالکان، شکارا چلانے والوں اور مقامی تاجروں سے ملاقات کرتے ہوئے کہیں۔ اس موقع پر انہوں نے زمینی صورتحال کا جائزہ لیا اور سیاحتی صنعت سے وابستہ افراد کے تحفظات اور مسائل براہ راست سنے۔
انہوں نے سیاحوں کی واپسی کو خوش آئند قرار دیتے ہوئے کہا، ’میں کشمیری عوام کے غیر متزلزل جذبے کو سلام پیش کرتا ہوں۔ ہماری قوم ملک بھر سے آنے والے مہمانوں کا کھلے دل سے خیر مقدم کرنے کے لیے تیار ہے۔ سیاحت کی بحالی نہ صرف معاشی استحکام کا ذریعہ ہے بلکہ یہ پوری ریاست کی پرامن تصویر دنیا کے سامنے پیش کرنے کا موقع بھی ہے۔‘
انہوں نے حکومت سے مطالبہ کیا کہ وہ سیاحتی صنعت سے وابستہ افراد کے تحفظات کو سنجیدگی سے لے اور اعتماد کی بحالی کے لیے تمام ممکن اقدامات کرے۔ تنویر صادق نے اس امید کا اظہار کیا کہ سیاحوں کی تعداد آنے والے دنوں میں بتدریج بڑھے گی۔
صادق نے وزیراعلیٰ کی طرف سے پہلگام اور گلمرگ میں کابینہ میٹنگز کے انعقاد کو ایک مثبت قدم قرار دیا اور کہا کہ اس طرح کے فیصلوں سے ممکنہ سیاحوں کے اعتماد میں اضافہ ہوتا ہے۔تنویر صادق نے کہا کہ جموں و کشمیر اس وقت امن اور استحکام کی طرف گامزن ہے، اور یہ ہماری اجتماعی ذمہ داری ہے کہ ہم سیاحت، بھائی چارے اور ترقی کے اس سفر کو مزید تقویت دیں۔