پہلگام کے بعد، وزیراعلیٰ عمر عبداللہ کا گلمرگ میں اعلیٰ سطحی اجلاس منعقد کرنے کا فیصلہ

عظمیٰ ویب ڈیسک
سرینگر/جموں و کشمیر کے وزیراعلیٰ عمر عبداللہ آج یعنی بدھ کو گلمرگ کے مشہور سیاحتی مقام پر وزراء اور اعلیٰ حکام کا اجلاس منعقد کریں گے۔ یہ اقدام ریاست میں سیاحت کو فروغ دینے اور حالیہ پہلگام دہشت گرد حملے کے بعد اعتماد بحال کرنے کی کوششوں کا حصہ ہے۔
جنرل ایڈمنسٹریشن ڈیپارٹمنٹ کی جانب سے جاری کردہ نوٹس کے مطابق، وزیراعلیٰ عمر عبداللہ کی زیر صدارت اجلاس آج 12 بجے گلمرگ میں ہوگا۔اجلاس میں اعلیٰ سول انتظامیہ کے افسران کے ساتھ ساتھ انسپکٹر جنرل پولیس کشمیر، ڈپٹی انسپکٹر جنرل نارتھ کشمیر، اور سینئر سپرنٹنڈنٹ آف پولیس بارہمولہ کی شرکت متوقع ہے۔
منگل کو عمر عبداللہ نے جنوبی کشمیر کے پہلگام میں کابینہ کے اجلاس کی صدارت کی تھی۔حکام کے مطابق، سول سیکریٹریٹ کی مضبوط حفاظتی دیواروں سے باہر اجلاس منعقد کرنے کا مقصد خوف کو کم کرنا اور لوگوں میں تحفظ اور اعتماد کا احساس پیدا کرنا ہے۔
انہوں نے کہا کہ اس اقدام سے کشمیر میں سیاحت کی بحالی میں مدد ملے گی، جو 22 اپریل کے دہشت گرد حملے کے بعد شدید متاثر ہوئی تھی۔ اس حملے میں 26 افراد ہلاک ہوئے تھے، جن میں زیادہ تر سیاح شامل تھے۔جموں و کشمیر حکومت سیاحت کی بحالی کے لیے ملک بھر سے آئے ہوئے ٹور اور ٹریول ایجنٹس کے ایک وفد کی میزبانی بھی کر رہی ہے۔