اودھم پور میں دو منشیات فروش گرفتار، ممنوعہ مواد بر آمد:پولیس

عظمیٰ ویب ڈیسک
سرینگر/منشیات کے خلاف جنگ کو جاری رکھتے ہوئے جموں وکشمیر پولیس نے ضلع اودھم پور کے رہام بل علاقے میں دو انتہائی مطلوب منشیات فروشوں کو گرفتار کرکے ان کی تحویل سے ممنوعہ مواد بر آمد کیا ہے۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن رہام بل کی ایک ٹیم نے چک مگائوٹ علاقے میں معمول کی گشت کے دوران دو افراد کو دھر لیا جنہوں نے پولیس کو دیکھ کر چھپنے کی کوشش کی۔
انہوں نے کہا کہ تلاشی کے دوران کی تحویل سے 5.7 گرام ہیرائن جیسا ممنوعہ مواد بر آمد کیا گیا جس کے بعد دونوں کی بر سر موقع ہی گرفتاری عمل میں لائی گئی۔گرفتار شدگان کی شناخت سمرن خان ولد بشیر خان ساکن جاکھنی اودھم پور اور شام ولد شنکر داس ساکن کوٹلی پین اودھم پور کے طور پر ہوئی ہے۔
ان کا کہنا ہے کہ پولیس نے اس سلسلے میں پولیس اسٹیشن رہام بل میں متعلقہ دفعات کے تحت ایک کیس درج کرکے مزید تحقیقات شروع کی ہیں۔ترجمان نے بتایا کہ کہ شام ولد شنکر داس کے خلاف منشیات فروشی اور چوری کے الزام میں کئی مقدمے پہلے ہی درج ہیں۔