عظمیٰ نیوزسروس
ادھم پور//لیفٹیننٹ گورنر منوج سِنہا نےادھمپورسے ’فزکس بھارت یاترا‘ کو ہری جھنڈی دِکھا کر روانہ کیا۔ اُنہوں نے اَپنے خطاب میں معروف طبیعیات دان پدم شری ڈاکٹر ایچ سی ورما کی قیادت میں اِنڈین ایسوسی ایشن آف فزکس ٹیچرس (آئی اے پی ٹی) اور نیشنل انویشکا نیٹ ورک آف اِنڈیا (این اے این آئی) کی جانب سے تجرباتی سائنس سیکھنے کو فروغ دینے اور طالب علموں میں تجسس، تخلیقی صلاحیتوں اور سائنسی مزاج کو فروغ دینے کے لئے شاندار اقدام کی ستائش کی۔لیفٹیننٹ گورنر نے کہا کہ ہندوستان کے ہر ضلع کا احاطہ کرنے والی’ فزکس بھارت یاترا‘ سائنس سیکھنے کی مشترکہ مشن کے تحت متنوع خطوں کو متحد کرے گی۔اُنہوں نے سکولوں، اَساتذہ اور سیکھنے والوں کے نیٹ ورک کو شاندار بات چیت کے ذریعے جوڑنے کے وِژنری اور تبدیلی کے سفر سے وابستہ تمام اَفراد کو مبارک باد اور نیک خواہشات پیش کیں۔لیفٹیننٹ گورنر نے کہا، ’’جب سائنس معاشرے کے تانے بانے کے ساتھ گہرائی سے جڑی ہوئی ہے ، تویہ نہ صرف اِختراع کو فروغ دیتی ہے بلکہ پورے معاشرے کے معیارِ زِندگی کو بہتر بنا کرقوم کی سمت متعین کرنے میں بھی اہم رول اَدا کرتی ہے۔‘‘اُنہوں نے کہا کہ گزشتہ ایک دہائی میں وزیر اعظم نریندر مودی کی قیادت میں آتم نربھارت کے تئیں ملک کی سوچ میں بڑی تبدیلی آئی ہے۔لیفٹیننٹ گورنرنے ’آپریشن سندور‘ کی کامیابی کا سہرا ہندوستان کی مقامی دفاعی صلاحیتوں،دفاعی شعبے میں ایجادات اور تکنیکی ترقی کو قرار دیا۔اُنہوں نے سائنس اَساتذہ کی تربیت، جدید سائنسی ترقیات کو کلاس روم اور لیبارٹری تک پہنچانے پر زور دیا۔ اُنہوں نے تعلیمی اِداروں سے اپیل کی کہ نوجوان محققین کو وسیع مواقع اور بڑے اہداف دئیے جائیں۔لیفٹیننٹ گورنرنے دُنیا بھر میں کام کرنے والے بھارتی سائنسدانوں اور انجینئروں سے وطن واپسی کی اپیل کرتے ہوئے کہا کہ اب ملک میں اختراعات کے لئے سازگار حالات موجود ہیں۔اُنہوںنے کہا کہ سائنس، روحانیت اور سنسکار کا سنگم ہندوستان کی عالمی قیادت کا باعث بنا ہے اور 2047 تک ایک ترقی یافتہ بھارت بنانے کا عزم ہمارا قومی عہد ہے۔اِس موقعہ پر پدم شری ڈاکٹر ایچ سی ورما نے ’فزکس بھارت یاترا‘ کے وژن اور مقصد کو بیان کرتے ہوئے کہا کہ اس اَقدام کا مقصد سائنسی تجربات اور عملی سیکھنے کو فروغ دینا ہے تاکہ سائنس کو عوام بالخصوص نوجوانوں کی روزمرہ زِندگی کا حصہ بنایا جا سکے۔اِس موقعہ پر لیفٹیننٹ گورنر نے طالب علموںکے بنائے گئے ماڈلوں اور تجربات پر مبنی فزکس نمائش کا بھی معائینہ کیا۔اِس موقعہ پر اودھمپور ویسٹ سے رُکن اسمبلی پون کمار گپتا، ممبر قانون ساز اسمبلی چنانی بلونت سنگھ منکوٹیا، ڈِی آئی جی اودھمپور ۔ ریاسی سارہ رِضوی، ضلع ترقیاتی کمشنراودھمپور سلونی رائے، کوآرڈی نیٹر ہیپی آئی اے پی ٹی انویشکا اُودھمپور منیش گلاٹی، دیگر سینئر اَفسران،آئی اے پی ٹی کے اراکین، طلاب ، اَساتذہ اور ممتاز شہری موجود تھے۔
