امت شاہ کی تمام وزرائے اعلیٰ کو ہدایت ،پاکستانی شہریوں کی شناخت کرکے انہیں واپس بھیجنے کی کارروائی شروع کیا جائے

عظمیٰ ویب ڈیسک
نئی دہلی/مرکزی حکومت، جو پہلگام حملے کے بعد پاکستان کے خلاف ہمہ جہت کارروائی کر رہی ہے، نے تمام ریاستوں سے کہا ہے کہ وہ جلد از جلد اپنےاپنے ریاستوں میں موجود پاکستانی شہریوں کی شناخت کریں تاکہ انہیں واپس بھیجا جا سکے ذرائع کے مطابق مرکزی وزیر داخلہ امت شاہ نے جمعہ کو تمام ریاستوں کے وزرائے اعلیٰ سے بات کی اور ان سے کہا کہ وہ اپنی ریاستوں میں پاکستانی شہریوں کی شناخت کریں۔
شاہ نے ان لوگوں کی شناخت کرنے اور انہیں واپس بھیجنے کے لیے کارروائی شروع کرنے کو بھی کہا ہے۔انہوں نے ریاستوں سے بھی کہا ہے کہ وہ مرکزی حکومت کو اس بارے میں مطلع کریں تاکہ پاکستانی شہریوں کے ویزے منسوخ کر کے انہیں جلد واپس بھیجا جا سکے۔
شاہ نے پہلگام حملے کے دن سری نگر کا دورہ کیا تھا تاکہ صورتحال کا جائزہ لیا جاسکے۔ اس کے بعد وزیر اعظم نریندر مودی کی زیر صدارت مرکزی کابینہ کی سیکورٹی امور کی کمیٹی کی میٹنگ میں پاکستان کے خلاف مختلف سطحوں پر کارروائی کرنے کا فیصلہ کیا گیا۔
ہندوستان نے 22 اپریل کے پہلگام دہشت گردانہ حملے کے بعد پاکستان کے خلاف سفارتی اور دیگر سطحوں پر کئی اقدامات کیے ہیں۔ ایک بڑے فیصلے میں ہندوستان نے سندھ طاس معاہدے کو روک دیا ہے اور پاک ہندوستان سرحد پر اٹاری چیک پوسٹ کو بھی بند کر دیا ہے۔ دہشت گردوں کے اس حملے میں 26 بے گناہ سیاحوں کو ہلاک اور کئی دیگر زخمی ہوگئے تھے۔