تیز گرمی کے بعد شدید بارشیں | جموں پھر تر بہ تر،سرشام تیز ہوائیں بھی چلیں

عظمیٰ نیوزسروس
جموں//محکمہ موسمیات کی پیش گوئی کے عین مطابق جموں میں بدھ کی دوپہر سے موسمی حالات دگر گوں ہوگئے جس کے بعد مطلع ابر آلود ہوگیا اور تیز ہوائیں چلنے لگیں جبکہ شام ہوتے ہوتے بارشوںکا سلسلہ شروع ہوا جو رات دیر تک جاری تھاجبکہ اگلے ایک ہفتے کے دوران موسم زیادہ تر خراب رہنے کا امکان ہے۔کل یعنی 17اپریل کو موسم بہتر رہ سکتا ہے اور اس دوران کسان اپنے کھیت کھلیانوں اور باغوں میں کام کر سکتے ہیں۔بعد ازاں 18سے 20اپریل تک جموں وکشمیر کے بیشتر حصوں میں وسیع پیمانے پر گرج چمک کے ساتھ بارشوں کا امکان ہے اور اس دوران تیز ہوائوں اور زور دار بارشوں کو خارج از امکان قرار نہیں دیا جا سکتا ہے ۔کسانوں سے کہا گیا ہے کہ وہ ان 3 دنوں کے دوران باغوں میں دوا پاشی کرنے سے احتراز کریں۔ 21اپریل کو موسم مجموعی طور پر خشک رہنے کا امکان ہے تاہم کچھ علاقوں میں ہلکی بارشیں بھی متوقع ہیں۔ بعد ازاں 22اپریل کو موسم بہتر رہ سکتا ہے اور کسانوں کے لئے اپنے باغوں میں دوا پاشی کرنے کے لئے اچھا موسم ہونے کی امید ہے ۔مسافروں اور مقامی لوگوں کو مشورہ دیا گیا ہے کہ وہ تازہ ترین موسمیاتی پیش گوئیوں کے ساتھ اپ ڈیٹ رہیں اور اسی کے مطابق اپنے منصوبے تیار کریں۔