عظمیٰ مانیٹرنگ ڈیسک
نئی دہلی// ٹیلی کمیونیکیشن ڈیپارٹمنٹ نے ایک نئی سروس شروع کی ہے۔ اس نئی سروس کے تحت ملک کے کروڑوں موبائل صارفین کو براہ راست فائدہ ملنے والا ہے۔ DoT کی نئی سروس کے تحت ملک کے موبائل صارفین اب دور دراز علاقوں میں بھی نیٹ ورک کنیکٹیویٹی حاصل کر سکیں گے۔ DoT کی جانب سے شروع کی گئی نئی سروس کا نام انٹرا سرکل رومنگ یعنی ICR ہے، جس کے تحت اب موبائل صارفین کو دور دراز علاقوں میں بھی نیٹ ورک کنیکٹیویٹی ملے گی۔محکمہ ٹیلی کمیونیکیشن کی نئی آئی سی آر سروس کے تحت ہر سم کے صارفین کو اس کا فائدہ ملے گا۔ اس میں Jio، Airtel، VI اور BSNL شامل ہیں، جس کا مطلب ہے کہ تمام صارفین دور دراز علاقوں میں ICR سروس کے تحت نیٹ ورک حاصل کرنے جا رہے ہیں۔ محکمہ ٹیلی کمیونیکیشن نے ایکس پر پوسٹ کرکے یہ جانکاری دی ہے۔آئی سی آر یعنی انٹرا سرکل رومنگ کا مطلب ہے کہ ایک ہی ٹیلی کام سرکل میں ایک موبائل آپریٹر کی سم استعمال کرنے والا صارف دوسرے موبائل آپریٹر کا نیٹ ورک استعمال کرکے موبائل سروسز استعمال کرسکتا ہے۔ فرض کریں کہ آپ دور دراز کے علاقے میں ہیں اور وہاں صرف Jio نیٹ ورک ہے اور آپ کے پاس BSNL نیٹ ورک ہے، تو آپ Jio موبائل نیٹ ورک کا استعمال کرکے نیٹ ورک کنیکٹیویٹی حاصل کر سکتے ہیں۔ٹیلی کمیونیکیشن ڈیپارٹمنٹ نے ٹیلی کام آپریٹرز کے ساتھ مل کر انٹرا سرکل رومنگ شروع کر دی ہے، لیکن ہم آپ کو بتاتے چلیں کہ انٹرا سرکل رومنگ صرف ڈیجیٹل انڈیا فنڈ کے ذریعے نصب موبائل ٹاور سے دستیاب ہوگی۔ کچھ دن پہلے اڈیشہ میں طوفان کی وجہ سے تمام ٹیلی کام آپریٹرز نے انٹرا سرکل رومنگ آن کر دی تھی تاکہ لوگوں کو نیٹ ورک سے متعلق کسی قسم کی پریشانی کا سامنا نہ کرنا پڑے۔
