عظمیٰ نیوزسروس
جموں// نائب وزیر اعلیٰ سریندر چودھری نے کہا کہ دریائے چناب پرمیترا۔رام بن پُل جس کی لاگت 41.78 کروڑ روپے ہے، اگست 2026 ء تک مکمل کیا جائے گا۔نائب وزیر اعلیٰ ایوان میںرُکن اسمبلی ارجن سنگھ راجو کی طرف سے اُٹھائے گئے سوال کا جواب دے رہے تھے۔اُنہوں نے کہا کہ اَفرادی قوت اور مشینری کو متحرک کر کے کام کی رفتار تیز کر دی گئی ہے تاکہ یہ منصوبہ مقررہ مدت میں مکمل ہو سکے ۔ اُنہوں نے ایوان کو مطلع کیا کہ سی آ ر آئی ایف کے تحت منظور شدہ اِس پُل کی تعمیر میں تاخیر ہوئی کیوں کہ این ایچ اے آئی نے اسے 4۔لین رام بن فلائی اوور کے ساتھ جُڑنے کی اجازت نہیں دی جہاں تیز رفتار گاڑیوں کی آواجاہی رہتی ہیں۔اُنہوں نے کہا کہ اب یہ پل پرانے قومی شاہراہ (این ایچ) سے جُڑے گا جس کی وجہ سے اس کی اونچائی 8.5 میٹر بڑھائی جا رہی ہے اور سپین 30 میٹر اضافے کے ساتھ 300 میٹر تک بڑھایا جا رہا ہے۔نائب وزیر اعلیٰ نے بتایا کہ:پل کے دونوں کناروں (ابٹمنٹس) کی بنیاد مکمل ہو چکی ہے۔میترا سائیڈ پر گینٹری نصب کر دی گئی ہے اور کاسٹنگ کاکام جاری ہے۔اُنہوں نے رام بن سائیڈ پر پیر ہیڈ کا کام جاری ہے اور سیگمنٹ اورڈیک سلیب کی کاسٹنگ بھی شروع کی گئی ہے۔اُنہوں نے مزید بتایا کہ اِس منصوبے میں تیزی آئی ہے کیوںکہ ٹھیکیدار نے بڑی تعداد میں اَفراد قوت اور مشینری کو متحرک کیا ہے۔اُنہوں نے کہا کہ 41.78 کروڑ روپے کے منظور شدہ بجٹ میں سے اَب تک 21.10 کروڑ روپے جاری کئے جا چکے ہیں اور منصوبہ اگست 2026 ء تک مکمل ہونے کی توقع ہے۔
دھار ۔ ادھم پور چار لین سڑک کا کام بی آر او کے ذریعے شروع ہو گا
عظمیٰ نیوزسروس
جموں//نائب وزیراعلیٰ سریندرکمار چودھری نے آج کہا کہ دھار۔ اودھمپور سڑک کو دو لین سے چار لین میں اَپ گریڈ کرنے کی تجویز پروجیکٹ سمپارک، بی آر او کے تحت دی گئی ہے اور اِس معاملے کو مزید منظوری کے لئے ناردرن کمانڈ کو بھیج دیا گیا ہے۔ نائب وزیراعلیٰ ایوان میں رُکن اسمبلی ستیش کمار شرما کے ایک سوال کا جواب دے رہے تھے۔اُنہوں نے کہا کہ جب مجاز اَتھارٹی اس منصوبے کو منظور کرے گی تو اس کی اَپ گریڈیشن اور چار لیننگ کا کام بارڈر روڈز آرگنائزیشن (بی آر او) انجام دے گا۔اِس موقعہ پر بلونٹ سنگھ منکوٹیہ ، راجیو جسروٹیہ اور پون گپتا نے بھی اِس معاملے میں ضمنی سوالات اُٹھائے۔
مائیگرنٹ قبائل میں جان و مال کے کسی نقصان کی کوئی اِطلاع نہیں:نائب وزیرا علیٰ
عظمیٰ نیوزسروس
جموں//حکومت نےمطلع کیاکہ گلاب گڑھ حلقہ کے سلسلے میں گزشتہ دو برسوں (2023 ء اور 2024ء ) میں یا نقل مکانی کے دوران بھاری بارش یا سیلاب کی وجہ سے قبائلی کمیونٹی کے کسی جانی یا مالی نقصان کی اطلاع نہیں ملی ہے۔ نائب وزیر اعلیٰ سریندر چودھری ایوان میں اِنجینئر خورشید احمد کے ایک سوال کا جواب دے رہے تھے ۔ وزیر اعلیٰ عمر عبداللہ کی جانب سے نائب وزیرا علیٰ نے ایوان کو یقین دِلایا کہ حکومت نقل مکانی کرنے والی قبائلی آبادی کی سلامتی ، حفاظت اور فلاح وبہبود کو یقینی بنانے کے لئے پُر عزم ہے۔
سڑکوں کی اَپ گریڈیشن ٹریفک دبائو اور سڑک کی خستہ حالی کو مد نظر رکھ کرکی جاتی ہے:نائب وزیر اعلیٰ
عظمیٰ نیوزسروس
جموں// نائب وزیر اعلیٰ سریندر چودھری نےکہا کہ سڑکوں کی اپ گریڈیشن ٹریفک کے بڑھتے ہوئے دباؤ اور اگر کہیں سڑک میں خرابی نظر آئے تو اس کے مطابق کی جاتی ہے۔نائب وزیراعلیٰ ایوان میں رُکن قانون ساز ٹھاکر رندھیر سنگھ کی طرف سے اُٹھائے گئے ایک سوال کا جواب دے رہے تھے۔اُنہوں نے کہا کہ محکمہ تعمیراتِ عامہ (آر اینڈ بی) کو ریاستی سڑکوں، بڑے ضلع کی سڑکوں، دیگر ضلع کی سڑکوں اور دیہاتی سڑکوں کی تعمیر کا اِختیار حاصل ہے۔نائب وزیر اعلیٰ نے بتایا کہ پی ڈبلیو ڈی ایم او آر ٹی ایچ کے ذریعہ تفویض کردہ قومی شاہراہوں کی بھی تعمیر کر رہا ہے۔اُنہوں نے کہا کہ سڑک کی ہر کیٹیگر ی کو ذیلی سطح کی مضبوطی اور آئندہ دس برسوں کے لئے ٹریفک کے دبائوکو مدنظر رکھتے ہوئے ڈیزائن کیا گیا ہے۔ اُنہوں نے مزید کہا کہ سڑک کے ہر زُمرے کی اَپ گریڈیشن کو اس وقت مدنظر رکھا جاتا ہے جب ٹریفک کا دبائو بڑھتا ہے اور سڑک کی خستہ حالی محسوس ہوتی ہے یا وسائل کی دستیابی سے مشروط جیومیٹرکس میں بہتری کی ضرورت ہوتی ہے۔