ایل او سی پر فوج ہائی الرٹ، یوم جمہوریہ کے پیش نظر حفاظتی اقدامات سخت

بارہمولہ// 76ویں یوم جمہوریہ کے موقع پر بھارتی فوج نے شمالی کشمیر کے ضلع بارہمولہ کے اوڑی سیکٹر میں لائن آف کنٹرول (ایل او سی) پر اپنی چوکسیت مزید بڑھا دی ہے۔
علاقے میں تعینات ایک فوجی اہلکار نے کہا، “لائن آف کنٹرول پر تعینات سپاہیوں کو جدید ہتھیاروں، نگرانی کے آلات اور اعلیٰ معیار کے لباس سے لیس رکھا گیا ہے۔ آپ نے محسوس کیا ہوگا کہ پچھلے چند سالوں میں دہشت گردی کی سرگرمیاں نمایاں طور پر کم ہوئی ہیں اور بہت سے آپریشنز کے ذریعے دہشت گردوں کو ختم کیا جا رہا ہے۔ ہم سال بھر فعال رہتے ہیں، لیکن یوم جمہوریہ اور دیگر اہم مواقع پر سیکیورٹی مزید سخت کر دی جاتی ہے”۔
انہوں نے مزید کہا، “ہم ایل او سی پر مکمل طور پر قابض ہیں۔ دہشت گرد بھی ٹیکنالوجی کا استعمال کرتے ہیں اور ان کے دراندازی کے طریقے بدلتے رہتے ہیں۔ ہم ان تمام تبدیلیوں کو اپنی مشقوں میں شامل کرتے ہیں تاکہ ہم سبقت لے سکیں اور انہیں ختم کر سکیں۔ موسم کی تبدیلی کے باوجود ہماری گشت جاری رہتی ہے۔ ہمارا مقصد کسی بھی دراندازی کی کوشش کو ناکام بنانا ہے۔ سپاہیوں کو خاص لباس، جدید نگرانی کے آلات اور صحت مند خوراک فراہم کی جاتی ہے تاکہ وہ ذہنی دباؤ سے آزاد رہیں”۔
اہلکار کا کہنا تھا کہ سینئر افسران سپاہیوں کے مسائل کے فوری حل کے لیے مسلسل رابطے میں رہتے ہیں۔ “یہ ایل او سی ہے اور یہاں سرحدی گاؤں ہیں، جہاں مقامی لوگ رہتے ہیں۔ ہم ہمیشہ ان کی مدد کے لیے تیار رہتے ہیں۔ اگر انہیں کسی طبی ایمرجنسی کا سامنا ہو تو ہم انہیں فوری طور پر اسپتال پہنچاتے ہیں۔ ہمارے ویٹرنری ڈاکٹر ان کے مویشیوں کا علاج بھی کرتے ہیں”۔
دوسری جانب کولگام میں بھی حفاظتی اقدامات سخت کر دیے گئے ہیں۔ فورسز نے گاڑیوں کی چیکنگ شروع کر دی ہے۔ قومی شاہراہ پر قاضی گنڈ، ضلع کولگام میں موبائل وہیکل چیک پوائنٹس اور ناکے قائم کیے گئے ہیں۔
کولگام ضلع پولیس کے مطابق پولیس اور سی آر پی ایف اہلکاروں کو این ایچ-44 کے ساتھ قاضی گنڈ میں تعینات کیا گیا ہے۔
ادھر سرینگر میں بھی یوم جمہوریہ کے پرامن انعقاد کے لیے سیکیورٹی کے کثیر الجہتی انتظامات کیے گئے ہیں۔
اس حوالے سے انسپکٹر جنرل آف پولیس (آئی جی پی) کشمیر زون، وی کے بردی نے بتایا، “26 جنوری کی تقریب وادی کشمیر میں بڑی اہمیت رکھتی ہے۔ اس کے لیے جموں و کشمیر پولیس نے مختلف اضلاع میں سیکیورٹی کے کام کیے ہیں تاکہ پوری فورس الرٹ رہے”۔
انہوں نے مزید کہا، “سرینگر ضلع میں بھی 26 جنوری کی ایک بڑی تقریب منعقد ہوگی، جس میں پریڈ ہوگی اور عوامی شرکت ہوگی۔ اس کے لیے سرینگر اور آس پاس کے علاقوں میں سیکیورٹی مزید سخت اور مضبوط کر دی گئی ہے”۔
دریں اثنا، یوم جمہوریہ پریڈ 2025 بھارت کی ثقافتی تنوع اور فوجی طاقت کی شاندار عکاسی کرے گی، جس میں بھارتی آئین کی 75ویں سالگرہ اور “جن بھاگیداری” پر خصوصی زور دیا جائے گا۔
یوم جمہوریہ کی تقریبات کا آغاز 26 جنوری کو وزیر اعظم نریندر مودی کی جانب سے قومی جنگی یادگار پر پھولوں کی چادر چڑھانے سے ہوگا۔ صدر جمہوریہ کارتویہ پاتھ پر ایک خصوصی گاڑی میں پہنچیں گے اور رسمی مارچ پاسٹ کے دوران سلامی لیں گے، جس میں مسلح افواج، نیم فوجی دستے، معاون سول فورسز، این سی سی، اور این ایس ایس کے یونٹس شامل ہوں گے۔