راجناتھ سنگھ نے جموں میں 108 فٹ بلند قومی پرچم لہرایا، ہیرٹیج میوزیم کا افتتاح کیا

اکھنور// وزیر دفاع راجناتھ سنگھ نے منگل کے روز جموں کے اکھنور سرحدی علاقے میں 108 فٹ بلند قومی پرچم لہرایا اور ایک ہیرٹیج میوزیم کا افتتاح کیا۔ اس دوران ان کا استقبال لیفٹیننٹ گورنر منوج سنہا، وزیراعلیٰ عمر عبداللہ اور اعلیٰ فوجی افسران نے کیا، جبکہ تقریب کے دوران سخت حفاظتی انتظامات کیے گئے۔
دفاعی ترجمان کے مطابق، وزیر دفاع نے ٹانڈہ آرٹلری بریگیڈ میں منعقد ہونے والی مسلح افواج کے سابق فوجیوں کے دن کی نویں سالگرہ کی تقریب میں شرکت کی، جہاں چیف آف ڈیفنس اسٹاف بھی ان کے ہمراہ تھے۔
اس میوزیم میں جموں و کشمیر کی مختلف جنگوں میں استعمال ہونے والے ہتھیاروں اور جنگی ہیروز کے مجسمے دکھائے گئے ہیں۔ ترجمان نے مزید بتایا کہ تقریب میں جموں، اکھنور، پلنوالہ، رکھموتھی، نوشہرہ اور سندربنی کے ایک ہزار سے زائد سابق فوجیوں کی شرکت متوقع ہے۔
اس موقع پر سابق فوجیوں کے لیے نقل و حرکت کے آلات جیسے خودکار وہیل چیئرز، ای-اسکوٹرز اور آٹو رکشے تقسیم کیے جائیں گے۔