محمد تسکین
بانہال// بدھ کی صبح سب ڈویژن بانہال کی تحصیل کھڑی کی ایک زیر تعمیر رابطہ سڑک پر ڈمپر کے ایک حادثے میں ڈمپر ڈرائیور کی اننت ناگ کے ہسپتال لیجانے کے دوران موت واقع ہوگئی ۔پولیس نے مہلوک ڈرائیور کی شناخت محمد اقبال 40ولد عبدالمجید خان ساکنہ چھانپہ بٹوت کے طور کی ۔مقامی لمبردار شاہنواز احمد نے فون پر کشمیر عظمیٰ کو بتایا کہ بدھ کی صبح قریب آٹھ بجے سرن ۔ سراچی سڑک پر ہانجوس کے قریب پیش آئے حادثے کی خبر ملتے ہی مقامی لوگ ، کیو آر ٹی کھڑی کے رضاکار اور کھڑی پولیس نے موقع پر پہنچ کر بچائو کاروائیوں کا آغاز کیا اور زخمی ڈرائیور کو سب ضلع ہسپتال بانہال پہنچایا گیا جہاں سے ضروری ابتدائی طبی امداد دینے کے بعد زخمی ڈرائیور کو گورنمنٹ میڈیکل کالج اننت ناگ منتقل کیا گیا لیکن وہ نویگہ ٹنل پار کرتے ہی دم توڑ دیا۔ زخمی ڈرائیور کو قریبی قاضی گنڈ ہسپتال بھی پہنچایا گیا جہاں ڈاکٹروں نے اسے مردہ قرار دیا۔ انہوں نے کہ قانونی لوازمات کے بعد لاش کو چھانپہ بٹوت کے آبائی علاقے میں بھیجا گیا ۔
