عظمیٰ نیوزسروس
کشتواڑ//ڈائریکٹر جنرل آف پولیس آر آر سوین نے سیکورٹی صورتحال اور آئندہ قانون ساز اسمبلی انتخابات کی تیاریوں کا جائزہ لینے کے لیے جموں زون کے ضلع ڈوڈہ اور کشتواڑ کا دورہ کیا۔ اس موقع پر پولیس سربراہ کے ہمراہ اسپیشل ڈی جی اور نامزد ڈی جی پی نلین پربھات، اے ڈی جی پی لاء اینڈ آرڈر وجے کمار، اور اے ڈی جی پی جموں زون آنند جین سمیت دیگرسینئر افسران بھی تھے۔ ڈی جی پی نے مچیل پاڈرمیں مچیل ماتا مندر سے اپنا دورہ شروع کیا، جہاں انہوں نے جاری یاترا کے سیکورٹی انتظامات کاجائزہ لیا۔ ڈی جی پی نے کشتواڑ میں ڈسٹرکٹ پولیس آفس اور ڈوڈہ ضلع کے بھدرواہ کے ڈاک بنگلہ میں اعلیٰ سطحی سیکورٹی جائزہ اور انتخابی تیاریوں کے الگ الگ اجلاسوں کی صدارت کی۔ ڈی جی پی نے دونوں اضلاع میں آئندہ انتخابات کے لئے سیکورٹی حکمت عملیوں کا جائزہ لیا۔ سیکورٹی اجلاسوں کی صدارت کرتے ہوئے، ڈی جی پی نے ہدایات دی کہ دہشت گردی کے ساتھ سختی سے نمٹنے اور انتخابات کے آزادانہ، منصفانہ انعقاد کو یقینی بنایا جائے ۔ انہوں نے جموں و کشمیر پولیس، سی آر پی ایف، فوج، سول انتظامیہ اور انٹیلی جنس ایجنسیوں کے درمیان آپسی تال میل کی کوششوں کو بڑھانے کی ضرورت پر زور دیا۔ اجلاس کے دوران افسران نے انتخابات کے لیے تعینات فوجیوں کے لیے مناسب رہائش اور سہولیات کے انتظامات سمیت سیکورٹی سے متعلق امور پر تبادلہ خیال کیا گیا اور ڈی جی پی کو درپیش خطرات کو کم کرنے کے ایکشن پلان اور سیکورٹی سے متعلق دیگر مسائل کے بارے میں تفصیلی جانکاری فراہم کی گئی۔ ڈی جی پی جموں و کشمیر نے پولیس کنٹرول روم کشتواڑ اور ڈی پی او کشتواڑ میں سی سی ٹی وی سرویلنس کا بھی معائنہ کرتے ہوئے نگرانی بڑھانے کی ہدایات جاری کیں۔ قبل ازیں، ڈی جی پی اور ان کے ساتھ موجود افسران نے کشتواڑ میں شہداء کی یادگار پر پھولوں کی چادر چڑھا کر جموں و کشمیر پولیس کے شہید ہونے والے ہیروز کو خراج عقیدت پیش کیا۔
