محمد تسکین
بانہال//جمعرات کی صبح کئی ہفتوں کے طویل انتظار کے بعد رام بن ضلع میں بارشیں ہوئیں جس سے عام لوگوں اور زمینداروں نے کسی حد تک راحت محسوس کی ہے۔ مجموعی طور پر کم از کم تین گھنٹوں تک ہوئی موسلادھار بارشوں سے موسم خوشگوار ہوگیا ہے اور دوپہر ایک بجے بعد دوبارہ دھوپ نکل آئی۔بارشوں کے باوجود جموں سرینگر قومی شاہراہ پر ٹریفک کی نقل و حرکت بغیر کسی خلل کے جاری رہی اور شری امرناتھ یاترا کی گاڑیوں کو نکالنے کے بعد شاہراہ پر مسافر بردار ٹریفک کو چلنے کی اجازت دی گئی اور ہزاروں کی تعداد میں گاڑیاں اپنی اپنی منزلوں کی طرف روانہ ہوئی ہیں۔ یاترا ٹریفک کو نکالنے کے بعد ہی نگروٹہ جموں سے صبح سات بجے سے مسافر گاڑیوں کو چلنے کی اجازت دی جاتی ہے جبکہ بانہال قاضی گنڈ فورلین ٹنل کو پار کرنے کے بعد ہی صبح ساڑھے گیارہ بجے بعد ہی کشمیر سے نسافر ٹریفک کو جموں کی طرف چلنے کی اجازت دی جاتی ہے۔ ٹریفک پولیس حکام نے کشمیر عظمی کو بتایا کہ جمعرات کی علی الصبح جموں کے بھگوتی نگر علاقے سے بالتل کے راستے جانے والے 1701 یاتریوں کو 66 بسوں میں روانہ کیا گیا جبکہ پہلگام کے راستے 2682 امرناتھ یاتریوں کو 91 چھوٹی بڑی مسافر گاڑیوں میں روانہ گیا گیا۔ انہوں نے کہا کہ یاترا کے دونوں قافلوں کو جموں سے روانہ کرنے کے بعد سات بجے سے مسافر گاڑیوں کو وادی کشمیر کی طرف روانہ کیا گیا جبکہ قاضی گنڈ سے دن کے ساڑھے گیارہ بجے سے مسافر گاڑیوں کو جموں کی طرف جانے کی اجازت دی گئی۔ انہوں نے کہا کہ ناشری اور بانہال کے درمیان کئی مقامات پر گاڑیوں کی سست رفتار کے ساتھ مجموعی طور پر ٹریفک کی نقل و حرکت معمول کے مطابق جاری تھی۔
