عظمیٰ نیوز سروس
جموں//ڈائریکٹر شعبہ باغبانی جموں، چمن لال شرما نے کٹھوعہ ضلع کا ایک وسیع دورہ کیا۔ دورے کے دوران موصوف نے ضلع کٹھوعہ میں ہولیسٹک ایگریکلچر ڈیولپمنٹ پروگرام اسکیم کے تحت ضلع کے چیف ہارٹیکلچر آفیسر کٹھوعہ اشونی شرما کی موجودگی میں گاؤں ہیرا نگر اور برنوتی میں کسانوں کے کھیت میں آم کے پودے لگا کر شجر کاری مہم کا آغاز کیا۔پروگرام کے دوران ڈائریکٹر نے کسانوں کے ساتھ بات چیت کی جس میں انہوں نے علاقے میں ہائی ڈینسیٹی پلانٹیشن کی حوصلہ افزائی کرنے کی ضرورت پر زور دیا۔انہوں نے پائیدار زرعی طریقوں کو فروغ دینے اور کسانوں کے معاشی استحکام کو بڑھانے کیلئے ان اقدامات کی اہمیت پر بھی زور دیا۔پروگرام کے دوران ڈائریکٹر نے ہیرا نگر گاؤں میں فارم میکانائزیشن اینڈ آٹومیشن کے تحت فائدہ اٹھانے والوں کو ٹریکٹر اور پاور ٹِلر کی چابیاں بھی حوالے کیں۔ڈائریکٹر ہارٹیکلچر جموں نے بارش کے موسم میں 10 لاکھ پھلوں کے پودوں کے ساتھ گرین جموں کا عہد لیا۔سی ایچ او کٹھوعہ نے کسانوں سے کہا کہ وہ مختلف اسکیموں کے فوائد حاصل کرنے کے لئے آگے آئیں اور پھلوں کی فصلوں کی پیداوار سے متعلق کسانوں کے تکنیکی مسائل کو بھی حل کیا۔ڈائریکٹر باغبانی نے ضلع کٹھوعہ کے ضلعی افسران، باغبانی کے ترقیاتی افسران، عہدیداروں اور فیلڈ فنکشنز کی ایک میٹنگ کی صدارت کی۔جاری سکیموں کا جائزہ لیتے ہوئے ڈائریکٹر ہارٹیکلچر نے تمام افسران و اہلکاروں پر زور دیا کہ وہ محکمانہ نرسریوں کی ترقی کے لئے شروعکئے گئے کاموں میں تیزی لائیں اور آگاہی کیمپس، کسان گوشتیاں وغیرہ کا انعقاد کریں تاکہ محکمانہ سکیموں کے بہتر نفاذ کو یقینی بنایا جا سکے۔
