عاصف بٹ
کشتواڑ // پولیس نے بدھ کو ضلع کشتواڑ میں مجرمانہ سرگرمیوں میں ملوث ایک کانسٹیبل کو نوکری سے برخاست کر دیا۔ پولیس ترجمان نے کہا کہ ایک پولیس کانسٹیبل کو قتل کے کیس سمیت کئی مجرمانہ مقدمات میں ملوث ہونے کی وجہ سے خدمات سے برخاست کر دیا گیا ہے۔ کانسٹیبل شام لال نے 9نومبر 2023کو ضلع کشتواڑ میں پولیس خدمات میں شمولیت اختیار کی جبکہ وہ اپنی طویل غیر حاضری اور فوجداری مقدمات میں ملوث ہونے کی وجہ سے پہلے ہی معطل تھا۔ مذکورہ کانسٹیبل کو 12نومبر 2023کو ڈی پی ایل کشتواڑ سے 3دن کی رخصتی کی اجازت ملی تھی اور اسے 15نومبر 2023 کو واپس رپورٹ کرنا تھا لیکن وہ ایسا کرنے میں ناکام رہا اور اس کے بعد اسے غیر حاضر قرار دیا گیا۔ اس کی غیر موجودگی کے دوران مذکورہ کانسٹیبل راجیش ڈوگرا عرف موہن تیر کے قتل کے مقدمہ میں ملوث پایا گیا تھا۔ قبل ازیں اسے پنجاب پولیس نے 7مارچ 2024کو گرفتار کیا تھا اور نیو ڈسڑکٹ جیل نابھا پنجاب میں رکھا تھا۔پولیس ترجمان کے مطابق اس کے خلاف محکمانہ انکوائری بھی شروع کی گئی۔ یہ بھی منظر عام پر آیا کہ مذکورہ کانسٹیبل بدستور فوجداری مقدمات میں ملوث رہا ہے اس کے خلاف اسی نوعیت کی محکمانہ انکوائری شروع کی گئی تھی۔ ضلع پولیس کی جانب سے تعینات انکوائری افسران کی سفارشات کے مطابق مذکورہ کانسٹیبل غیر حاضری کا عادی ہے اور مجرمانہ ذہنیت رکھنے والے کو خدمات سے برخاست کیا جاسکتا ہے جس کے بعد ایس ایس پی کشتواڑ نے مناسب طریقہ کار کی پیروی کے بعد کانسٹیبل شام لال نمبر 698/KTR کو نوکری سے برطرف کر دیا۔ایس ایس پی کشتواڑ نے تمام پولیس اہلکاروں کو متنبہ کیا کہ اگر کوئی ملک مخالف سرگرمیوں، منشیات کی سمگلنگ یا کسی بھی گھناؤنے جرائم میں ملوث پایا گیا تو اسے سخت تادیبی کاروائیوں کا سامنا کرنا پڑے گا۔
