اشتیاق ملک
ڈوڈہ //پولیس و سیکورٹی فورسز نے گزشتہ روز ڈوڈہ ضلع کے پل ڈوڈہ سے ایک ایس پی او کی رائفل لے کر فرار ہوئے محمد رفیع ولد محمد اقبال ساکنہ ترون کو 24 گھنٹے کے اندر ہی رائفل سمیت اپنے نزدیکی گاؤں سے گرفتار کیا ہے۔پولیس ذرائع کے مطابق منگل کے روز دوپہر تین بجے کے قریب محمد رفیع ولد محمد اقبال سکنہ ترون تحصیل بھالہ نے ایک ایس پی او کی اے کے 47 رائفل لے کر فرار ہوا.اس واقعہ کے فوراً بعد پولیس نے 4 راشٹریہ رائفلز کی مدد سے علاقہ کا محاصرہ کیا اور مفرور شخص کی تلاش کے لئے وسیع پیمانے پر مہم شروع کی۔تلاشی مہم کے دوران پولیس و فوج نے مفرور شخص کو ترون گاؤں کے نزدیکی جنگل میں رائفل سمیت حراست میں لیا۔ ایس ایس پی ڈوڈہ جاوید اقبال نے میڈیا سے گفتگو کرتے ہوئے کہا کہ محمد رفیع کو بندوق سمیت گرفتار کر لیا گیا ہے اور اس کی مزید تحقیقات شروع کی گئی ہے. واضح رہے کہ رواں ماہ کی 11 تاریخ کو چھترگلہ بھدرواہ میں ملی ٹینٹوں نے پولیس و آرمی کے جائنٹ ناکہ پر گولی چلائی تھی جس میں 6 اہلکار زخمی ہوئے تھے اور 12 جون کو گندوہ علاقہ کے کوٹا ٹاپ میں ملی ٹینٹوں و فوج کے درمیان مختصر جھڑپ میں ایک پولیس اہلکار زخمی ہوا تھا اور ملی ٹینٹ فرار ہوئے تھے۔ ان دو واقعات کے بعد ضلع کے مختلف مقامات پر پولیس و فوج نے تلاشی کارروائیاں شروع کیں اور کئی افراد کو پوچھ تاچھ کے لیے حراست میں بھی لیا گیا ہے. پولیس نے 4 ملی ٹینٹوں کا خاکہ جاری کرتے ہوئے ان کی صیح اطلاع دینے والے شخص کو 5 لاکھ روپے کا انعام دینے کا بھی اعلان کیا ہے۔
