مودی کی تیسری میعاد میں ہندوستان تیسری بڑی معیشت بن جائے گا

عظمیٰ نیوز سروس
ادھم پور//مرکزی وزیر ڈاکٹر جتیندر سنگھ نے کہا کہ نریندر مودی کے وزیر اعظم کی تیسری مدت میں ہندوستان دنیا کی تیسری سب سے بڑی معیشت بن کر ابھرے گا۔انہوں نے کہا کہ بھارت کی ترقی کی کہانی میں اضافے کے رجحان کو جاری رکھنے کے لئے پی ایم مودی کی سربراہی میں بی جے پی کی قیادت والی حکومت کی واپسی میں ملک کیلئے ضروری ہے ۔مرکزی وزیر مملکت سائنس اور ٹیکنالوجی ڈاکٹر جتیندر سنگھ آئندہ لوک سبھا انتخابات کے لئے بی جے پی کے انتخابی دفتر کے آغاز کے موقع پر بات کر رہے تھے۔انہوں نے کہا کہ’’ 2014 میں جب پی ایم مودی نے اقتدار سنبھالا تو ہندوستان دنیا کی دسویں معیشت کے طور پر کھڑا تھا۔ دس سال سے بھی کم عرصے میں، ہم برطانیہ کو پیچھے چھوڑ کر پانچویں نمبر پر آگئے، جس نے تقریباً دو صدیوں تک ہم پر حکومت کی‘‘۔انہوں نے امید ظاہر کی کہ اس سال یہ چوتھی سب سے بڑی معیشت کے طور پر ابھرے گا اور پی ایم مودی کی تیسری میعاد کے دوران، ہندوستان دنیا کی تیسری سب سے بڑی معیشت ہو گی، جو 2047 تک نمبر 1 کی معیشت بن جائے گی‘‘۔ڈاکٹر جتیندر سنگھ نے کہا کہ پی ایم مودی کی قیادت میں پچھلے دس سالوں میں ہندوستان نے کئی عالمی معیارات میں تیزی سے اضافہ ریکارڈ کیا ہے۔مرکزی وزیر نے کہا کہ مالی سال2023-24کے دوران، ہندوستانی معیشت نے لگاتار تیسرے سال 7 فیصد سے زیادہ کی شرح سے ترقی کی یہاں تک کہ عالمی معیشت 3 فیصد سے زیادہ ترقی کے لئے جدوجہد کر رہی ہے۔ انہوں نے کہا کہ’’ ہم امریکہ اور برطانیہ کے بعد دنیا کی تیسری سب سے بڑی فن ٹیک معیشت ہیں‘‘۔ڈاکٹر جتیندر سنگھ نے کہاکہ ہندوستان میں دنیا بھر میں تیسرا سب سے بڑا اسٹارٹ اپ ایکو سسٹم ہے۔ انہوں نے کہا کہ سال 2014 میں تقریباً 350 اسٹارٹ اپس سے، ہندوستان میں اسٹارٹ اپ نو سالوں میں 300 گنا سے زیادہ بڑھے۔انہوں نے کہا کہ 2016 میں خصوصی اسٹارٹ اپ اسکیم شروع ہوئی اور آج ہمارے پاس 1,30,000 سے زیادہ اسٹارٹ اپ ہیں۔ڈاکٹر جتیندر سنگھ نے کہاکہ صرف چار سال کے مختصر عرصے میں، اسپیس اسٹار اپس کی تعداد محض ایک ہندسے سے بڑھ کر 150 سے زیادہ ہوگئی ہے۔ اس کے علاوہ، لیوینڈر سیکٹر میں 6,300 سے زیادہ بائیو ٹیک اسٹارٹ اپ اور 3,000 سے زیادہ ایگریٹیک اسٹارٹ اپس ہیں۔ انہوں نے کہاکہ2024کا ہندوستان ایک بڑی ترقی کیلئے تیار ہے ۔انہوں نے کہاکہ2014 کے بعد سے پچھلے 10 سالوں میں ادھم پور- کٹھوعہ- ڈوڈہ کو سب سے زیادہ ترقی یافتہ لوک سبھا حلقوں میں سے ایک قرار دیتے ہوئے کہاکہ اس حلقے کو رول ماڈل کے طور پر پیش کیا جا رہا ہے۔ انہوں نے کہا کہ گزشتہ 10 سالوں میں نہ صرف کئی قومی اور اپنی نوعیت کے پہلے منصوبے لائے گئے بلکہ ان منصوبوں کو بھی بحال کیا گیا جنہیں سابقہ حکومتوں نے ترک کر دیا تھا۔ڈاکٹر جتیندر سنگھ نے کہا کہ یہ واحد لوک سبھا حلقہ ہے، جس نے تین مرکزی فنڈڈ میڈیکل کالج، دو پاسپورٹ آفس، دنیا کا سب سے اونچا ریلوے پل، چینانی سے ناشری تک ایشیا کی سب سے لمبی سڑک ٹنل جسے شیاما پرساد مکھرجی ٹنل کہا جاتا ہے، شمالی ہندوستان کا پہلا صنعتی بائیوٹیک پارک حاصل کیا ہے۔ ، بسوہلی میں شمالی ہندوستان کا پہلا کیبل فری برج اٹل سیٹو، کشتواڑ میں تقریباً 4 سے 5 ہائیڈرو پاور پروجیکٹس جو اسے ہندوستان کا پاور ہب بناتے ہیں۔ شاہ پور-کنڈی قومی آبپاشی پروجیکٹ، کٹرہ سے دہلی تک سب سے طویل ایکسپریس کوریڈور، ایک کے بجائے دو وندے بھارت ایکسپریس ٹرینیں کٹرہ سے دہلی کے اسی راستے پر تقریباً 200 پل اور چھوٹے پل جبکہ ضلع ادھم پور کو پی ایم جی ایس وائی روڈز میں ہندوستان کے سب سے اوپر تین اضلاع قرار دیا گیا ہے۔