سرینگر میں بی ایس ایف ہیڈ کوارٹر میں آتشزدگی، بیرک کو نقصان

سرینگر// سری نگر کے صنعت نگر علاقے میں قائم بی ای ایف کے ہیڈ کوارٹر میں منگل کی صبح آگ کی ایک واردات میں املاک کو کافی نقصان ہوا ہے۔
فائر اینڈ ایمرجنسی کے ایک عہدیدار نے بتایا کہ سری نگر کے صنعت نگر علاقے میں قائم بی ایس ایف ہیڈ کوارٹر میں ایک بیرک اور ڈائننگ ہال کو آگ سے کافی نقصان پہنچا۔انہوں نے کہا کہ یہ واقعہ منگل کی علی الصبح قریب ساڑھے چار بجے پیش آیا۔ ان کا کہنا تھا کہ آگ کے شعلوں کو بجھانے کے لئے 7 فائر ٹنڈرس کو کام پر لگا دیا گیا جنہوں نے آگ کو قابو میں کرکے اس کو مزید پھیلنے سے روک دیا۔
حکام کا کہنا ہے کہ آگ کی اس واردات میں کسی قسم کا کوئی جانی نقصان نہیں ہوا ہے۔ انہوں نے کہا کہ آگ لگنے کی وجوہات معلوم کی جا رہی ہیں۔