شمال و جنوب میں شب خوانی کی روح پرور مجالس کا انعقاد
بلال فرقانی
سرینگر// ملک کے مختلف حصوں کی طرح جموں وکشمیر میں بھی جمعہ کے روز ولادت باسعادتؐ کی مناسبت سے تقریب سعید نہایت ہی عقیدت واحترام کے ساتھ منائی گئی۔اس سلسلے میں یونین ٹریٹری کے درجنوں مقامات سے جلوس برآمد ہونے کے علاوہ سینکڑوں مساجد، زیارت گاہوں، خانقاہوں اور امام بارگاہوں میں خصوصی مجالس کا انعقاد کیا گیا۔ رات بھر جاری رہنے والی شب خوانی کی تقریبات میں سردی کے باوجود ہزاروں کی تعداد میںعقیدت مند محو رہے جبکہ دن کے دوران وادی کے اطراف و اکناف میں جشن میلاد ؐکے عظیم الشان جلوس برآمد ہوئے جن میں ہزاروں لوگوں نے شرکت کی۔ اس دن کی مناسبت سے سب سے بڑی تقریب آثار شریف درگاہ حضرت بل میں منعقد ہوئی جہاں وادی کے مختلف حصوں سے آئے ہوئے لوگوںنے شب خوانی کی روح پرور مجالس میں حصہ لیا۔ درگاہ حضرت بل میں نماز کے اجتماعات میں ہزاروں کی تعداد میں مرد وزن نے شرکت کی اور موئے پاک کا دیدار کیا۔
شب خوانی کی مجالسجناب صاحب صورہ، آثار شریف شہری کلاشپورہ،کھرم سرہامہ، آثار شریف پنجورہ شوپیان،کعبہ مرگ،سیر ہمدان،خانقاہ فیض پناہ ترال، خانقاہ معلی سرینگر، کے علاوہ وادی کے دیگر اضلاع اور قصبہ جات پلوامہ ، کولگام ،سوپور، بانڈی پورہ ، اسلام آباد ، بارہمولہ اور کپوارہ میں انعقاد کیا گیا ۔جبکہ صوبہ جموں بالخصوص خطہ چناب و پیر پنچال اور خطہ لداخ کے لیہہ، کرگل اور دراس میں بھی اس ضمن میں منائی جانے والی خصوصی مجالس کا انعقاد کیا گیا اور جلوس برآمد ہوئے۔ تقریباً تمام تجارتی مراکز، مساجد، زیارت گاہوں اور اور دیگر عبادت گاہوں کو برقی قمقموں سے سجایا گیا تھا۔ بعض مقامات پر لوگوں نے اپنے گھروں کو بھی برقی قمقموں اور بتیوں سے سجایا ۔ انتظامیہ نے آثار شریف درگاہ حضرت بل میں زائرین کو ہر ممکن سہولیت پہنچانے کی غرض سے تمام انتظامات کئے تھے جن میں بلا خلل،بجلی ،پینے کا صاف پانی،طبی ،ٹرانسپورٹ ،صحت وصفائی کے علاوہ دیگر سہولیات شامل ہیں۔محکمہ امور صارفین و عوامی تقسیم کاری اور جموں وکشمیر بینک نے درگاہ حضرت بل میں زائرین کے لئے طعام کے معقول انتظامات کئے گئے تھے۔عقیدتمندوں کو درگاہ تک لانے اور لے جانے کے لئے اسٹیٹ روڈ ٹرانسپورٹ کارپوریشن (ایس آر ٹی سی) نے دیر رات تک ٹرانسپورٹ سہولیت دستیاب کی تھی۔
