غلام نبی رینہ
کنگن// ہرمکھ گنگہ بل یاترا کل کنگن کے ناراناگ علاقے سے شروع ہوئی ۔ کشمیری پنڈتوں کے گروپ کو ڈپٹی کمشنر گاندربل، شیامبیر سنگھ اور ایس ایس پی گاندربل نکھل بورکر نے جھنڈی دکھا کر روانہ کیا۔اس موقعہ پر دیگر سول اور پولیس افسران بھی موجود تھے۔تقریبا 70 یاتری ناراناگ مندر سے سالانہ ہرمکھ گنگبل یاترا کے لیے مذہبی جوش و خروش کے درمیان روانہ ہوئے اور ان کے ساتھ ایس ڈی آر ایف ٹیم، پولیس اور دیگر اہلکار بھی تھے۔ناراناگ مندر میں پوجا کرنے کے بعد،یاتریوں نے گنگبل جھیل تک پیدل 36 کلومیٹر کا سفر طے کیا، جو ہرمکھ پہاڑی سلسلے میں سطح سمندر سے تقریبا 14,500 فٹ کی بلندی پر واقع ہے۔ہفتہ کو گنگبل جھیل کے کنارے خصوصی پوجا کی جائے گی جس کے بعد یاتری اگلے دن گنگبل سے واپس لوٹیں گے۔یاترا کا اہتمام ہرمکھ گنگا ٹرسٹ اور آل پارٹیز مائیگرنٹس کوآرڈینیشن کمیٹی کے بینر تلے کیا گیا تھا۔ ضلع انتظامیہ نے زائرین کے لیے رہائش، خوراک، طبی اور حفاظتی انتظامات سمیت تمام انتظامات کر لیے ہیں۔ڈپٹی کمشنر گاندربل شیامبیر سنگھ نے بتایا کہ انتظامیہ نے یاترا کے لیے تمام متعلقہ اور حفاظتی انتظامات کیے ہیں۔
