عظمیٰ نیوز سروس
رام بن// جموں وکشمیر کے ضلع رام بن کی ایک عدالت نے بدھ کو ایک شخص کو تقریباً 10 سال قبل اپنے دو سالہ بیٹے کو زہر دے کر ہلاک کرنے کے جرم میں عمر قید کی سزا سنائی ہے۔پولیس کے ایک ترجمان نے بتایا کہ ضلع اور سیشن جج، رام بن، آر ایس جسروٹیا نے اند گاوں کے رہنے والے محمد شفیع کو اس کے بیٹے محمد سلیمان کے قتل میں مجرم قرار دیا ہے۔انہوں نے کہا کہ بچہ 30 اکتوبر 2013 کو اپنے گھر میں مشکوک حالات میں مردہ پایا گیا تھا اور دوران تفتیش یہ بات سامنے آئی کہ شفیع نے بچے کو زہریلی کیڑے مار دوا پلائی تھی جس کی وجہ سے اس کی موت واقع ہوئی۔ترجمان نے بتایا کہ 30 نومبر 2013 کو قتل کا مقدمہ درج کیا گیا اور ملزم کے خلاف 26 جنوری 2014 کو عدالت میں چارج شیٹ داخل کی گئی۔انہوں نے کہا کہ آخر کار شفیع کو عمر قید اور 10,000 روپے جرمانے کی سزا سنائی گئی۔ترجمان نے کہا کہ جرمانے کی رقم کی عدم ادائیگی کی صورت میں ملزم کو مزید چھ ماہ قید کی سزا بھگتنا ہوگی۔
