پرویز احمد
سرینگر //شیر کشمیر انسٹی ٹیوٹ آف میڈیکل سائنسز صورہ میں پر تعینات کی گئیں 65سٹاف نرسوں کو گھر میں بیٹھنے کا حکم دیا گیا ہے۔ مذکورہ نرسوں نے بتایا کہ نہ تو ان کی خدمات میںمزید توسیع کی جارہی ہے اور نہ ہی پچھلے 6ماہ سے ان کوتنخواہیں دی گئیں۔ سکمز صورہ میں کام کرنے والی ایک نرس نے بتایا کہ گذشتہ سال مئی میں ان کو 6ماہ کیلئے ایکڈمک ارینجمنٹ کیلئے تعینات کیا گیا لیکن یہ معیاد ختم ہونے کے بعد سکمز انتظامیہ نے ہمیں مزید 6ماہ کام جاری رکھنے کی ہدایت دی ۔ مذکورہ نر س نے بتایا ’’ اس بار انتظامیہ نے کوئی حکم نامہ جاری نہیں کیا لیکن کام جاری رکھنے کی ہدایت کے بعد ہم نے مزید 6ماہ کام کیا‘‘۔ مذکورہ نرس نے بتایا کہ پچھلے 6ماہ کی تنخوہیں ابھی واگذار ہونے باقی ہیں لیکن سکمز انتظامیہ نے نئی عملہ کی بھرتی کیلئے نوٹفیکیشن جاری کیا۔ مذکورہ نرس نے بتایا کہ ہم نے سکمز انتظامیہ کی جانب سے جمعہ کو جاری کی گئی نوٹفیکیشن پر عدالت سے حکم امتناعی حاصل کیا ہے۔ انہوں نے کہا کہ سکمز صورہ کے ایڈمنسٹریٹو آفیسر ہمیں گھر بیٹھنے کا حکم دے رہے ہیں۔ سکمز صورہ کے میڈیکل سپر انٹنڈنٹ ڈاکٹر فاروق احمد جان نے کشمیر عظمیٰ کوبتایا کہ تنخواہیں انہیں مل جائیں گی ، فائل گئی ہے لیکن ابھی فائل واپس نہیں آئی ہے۔ انہوں نے کہا کہ جہاں تک فائل کی واپسی کا تعلق ہے تو میں یہ نہیں بتا سکتا کب واپس آئے گی ۔ یہ بات قابل ذکر ہے کہ سکمز صورہ میں نیم طبی عملہ کی کمی کو پورا کرنے کیلئے سٹاف نرسوں کو عارضی بنیادوں پر تعینات کیا جارہا ہے لیکن ڈیوٹی دینے والی نرسوں کی مکمل تعیناتی کے حوالے سے کوئی بھی انتظام نہیں کیا جارہا ہے۔
