جموں //سرکار ی اشتہاری کی ادائیگی کے لئے اخباروں اور جریدوں کی ایمپنلمنٹ کے حوالے سے جون 2015ء میں ریاستی سرکار کی طرف سے تشکیل دی گئی ایمپنلمنٹ کمیٹی کی میٹنگ آج محکمہ اطلاعات کے فائنانشل کمشنر بی بی ویاس کی صدارت میں منعقد ہوئی ۔میٹنگ میں کمیٹی کے ممبران ناظم اطلاعات ڈاکٹر شاہد اقبال چودھری ،سپیشل سیکرٹری فائنانس ایم راجو، ایڈیشنل سیکرٹری داخلہ خالد جہانگیر ، ایڈیشنل سیکرٹری اطلاعات آر کے کٹوچ ، جوائنٹ اطلاعات ہیڈ کوارٹر س عبدالمجید زرگر، ایسوسی سیٹ پروفیسر ایم ای آر سی سرینگر صبیحہ مفتی ،سپیشل آفیسر آئی آئی ایم سی جموں منوہر کھجوریہ کے علاوہ محکمہ کے دیگر افسران بھی موجود تھے۔کمیٹی نے سرکاری اشتہاری کی واگذاری کے لئے منظور شدہ اخباروں اور جریدوں کی زمرہ بندی کے لئے اپنائے جانے والے طریقہ کار کی توثیق کی۔ کمیٹی نے محسوس کیا کہ اشتہاری پالیسی 2016ء کے مطابق منظور شدہ اخباروں اور جریدوں کو مختلف نکات کے عوض اے ، بی ، سی اور ڈی زمروں میں رکھا جائے گا۔ان میں پبلکیشن کیلئے 50 پوائنٹ ، ہئیت اور تحریری مواد کے معیار کے لئے 20پوائنٹ ، بنیادی ڈھانچے اور عملے کے لئے 20پوائنٹ جبکہ ادارہ جاتی ڈھانچہ کے لئے 10پوائنٹ دئیے جائیں گے ۔جو اخبارات اور جریدے 81سے 100پوائنٹ حاصل کریںگے انہیں اے زمرے میں رکھا جائے گا ، جو 61سے 80 پوائنٹ حاصل کریں گے انہیں بی زمر ے میں ، جو 41سے 60 پوائنٹ حاصل کریں گے انہیں سی زمرے میں جبکہ 40پوائنٹ تک حاصل کرنے والے اخبار اور جریدے ڈی زمرے میں رکھے جائیں گے۔کمیٹی نے کشمیر اور جموں صوبہ کے لئے اشتہاری پالیسی 2016 ء کے سیکشن 6.1 کے عین مطابق موجودہ ایمپنلڈ اخباروں اور جریدوں کا جائزہ لینے کے لئے دو کمیٹیاں تشکیل دینے کو بھی منظوری دی۔میٹنگ میں الیکٹرانک اور آن لائن میڈیا کے لئے اشتہارات کی اجرائی کیلئے رہنما خطوط پر بھی تفصیلی تبادلہ خیال ہوا۔ میٹنگ میں فیصلہ کیا گیا کہ آئی ٹی، قانون ، فائنانس ،داخلہ اور دیگر متعلقہ محکموں کے نمائندو پر مبنی ایک ٹیکنیکل سب کمیٹی تشکیل دی جائے گی جو الیکٹرانک اور آن لائن میڈیا کیلئے اشتہارات کی اجرائی کے لئے رہنما خطوط کو تقویت بخشیں گے۔میٹنگ میں کئی نئے اخباروں اور جریدوں کی ایمپنلمنٹ کے نئے معاملات پر بھی تبادلہ خیال ہوا اور یہ فیصلہ لیا گیا کہ محکمہ اطلاعات آج کمیٹی کی طرف سے وضع کی گئی سفارشات کے مطابق اِن اخباروں اور جریدوں کی فہرست تیار کرے گی۔
وِیاس کی صدارت میں ایمپنل کمیٹی کااجلاس
