سرینگر//نوجوان نسل پر ظلم و زیادتیوں کو ناقابل برداشت قرار دیتے ہوئے نیشنل فرنٹ چیئر مین نعیم احمد خان نے ریاستی سرکار کو خبردار کرتے ہوئے کہا کہ اگر فوری طور پر کشمیری نوجوانوں کو ٹارگٹ کرنا بند نہیں کیا گیا تو اس کے سنگین نتائج بر آمد ہونگے۔انہوں نے گذشتہ روز ایک بار پھر سرینگر،اننت ناگ،بانڈی پورہ، کنگن اور پٹن میں طلباءو طالبات پر تشدد ڈھانے پر افسوس کا اظہار کرتے ہوئے کہا کہ وردی پوش اہلکارتمام حدیں پار کررہے ہیں اور اس کیلئے اُنہیں حکام کا آشیرواد حاصل ہے۔نعیم خان نے سرینگر میں پولیس کے ہاتھوں ایک اور طالبہ کے زخمی ہونے پر شدید تشویش کا اظہار کیا۔ انہوں نے کہا کہ ہماری پوری نوجوان نسل بھارتی نشانے پر ہے اس کو مسلسل نشانہ بنایا جارہا ہے جو ناقابل برداشت ہے اور اگر اس سلسلے کو فوری طور پر نہیں روکا گیا تو اس کے خلاف سنگین رد عمل ظاہر ہوگا۔انہوںنے کہاکہ نئی دلی اور اس کے مقامی گماشتوں نے ریاست کے اندرایک ایسی صورتحال تیار کر رکھی ہے جس کیخلاف مظاہرے ناگزیربن گئے ہیں کیونکہ کشمیری عوام ہر گزرنے والے دن کے ساتھ سیاسی طور پر باشعور ہوتے جارہے ہیں اور جانتے ہیں کہ بھارت اور اس کے مقامی آلہ کاروں کی پالیسیاں کتنی کشمیر مخالف ہیں۔ انہوں نے مزید کہا کہ امن و قانون کی آڑ میں ہماری نوجوان نسل کو پس از دیوار کیا جارہا ہے جس کیخلاف ہر کشمیری کی طرف سے رد عمل کا ظاہر ہونا ایک فطری بات ہے۔۔ نعیم خان نے کہا کہ صرف وادی نہیں بلکہ جموں صوبہ کے مسلم اکثریتی خطوں میں بھی عوام ظلم و جور کے مہیب سایوں میںجی رہے ہیں۔
نوجوانوں کو ٹارگٹ بنانے کے سنگین نتائج برآمد ہونگے: نعیم خان
